სირიაში, იდლიბის პროვინციაში, თურქულმა საჰაერო ძალებმა ასადის რეჟიმის ორი საფრონტო ბომბდამშენი, სუ-24 ჩამოაგდო. ამის შესახებ რიანოვოსტი წერს არაბულ მედიაზე დაყრდნობით.

გაცხადებული ინფორმაციით, რუსული წარმოების თვითმფრინავები თურქულმა ფ-16-ის ტიპის გამანადგურებელმა ჩამოაგდო. ტვიტერის სოციალური ქსელით ვრცელდება კადრები, სადაც ასახულია ალმოდებული თვითმფრინავის ჩამოვარდნის კადრები.

რამდენიმე საათით ადრე რუსეთის მხარის მიერ მხარდაჭერილმა სირიის სამთავრობო ძალებმა საჰაერო სივრცის დახურვის შესახებ გამოაცხადა და პირობა დადო, რომ ყველა უცხოური საფრენი აპარატი ჩამოგდებული იქნებოდა, თუმცა როგორც ჩანს, თურქულმა გამანადგურებლებმა არ გაითვალისწინეს ასადის რეჟიმის გაფრთხილება, შეფრინდნენ სირიის საჰაერო ზონაში და ჩამოაგდეს რუსული წარმოების ბომბდამშენები. დილიდან აქტიურად მიმდინარეობს თურქული არმიის შეტევა სირიელთა პოზიციებზე- უწყვეტ რეჟიმში მუშაობენ თურქული საარტილერიო დანადგარები, რომლებიც სირიის არმიის პოზიციებს ბომბავენ.