„თურქეთი სირიის საკითხთან დაკავშირებით არ ეძებს თავგადასავლებს და არ ცდილობს თავისი ტერიტორიების გაფართოებას“- ამის შესახებ განაცხადა რეჯეფ ტაიპ ერდოღანმა სტამბოლში მედიისთვის მიმართვისას.

მისი თქმით, თურქეთში უკვე იმყოფება 3.7 მილიონი სირიელი და ქვეყანას არ სურს, ლტოლვილების კიდევ ახალი ტალღის მიღება.

“ნახევარი მილიონი სირიელი იმყოფება ამჟამად სირიის საზღვართან. ეს ხალხი გარბის ბაშარ ალ-ასადის რეჟიმის მიერ ჩადენილი ძალადობისა და უკანონობისგან. ჩვენ არ ვესწრაფით ნავთობის საბადოებისა და სირიის მიწის დაუფლებისთვის. იდლიბის პრობლემა გამოიწვია იმ ფაქტმა, რომ ისინი ცდილობენ ჩვენზე ზეწოლას, პროვოცირებას და იმ მიღწევებისთვის ძირის გამოთხრას, რაც გაკეთდა მშიდობიანი ურთიერთთანამშრომლობისთვის“- განაცხადა თურქეთის პრეზიდენტმა.

ერდოღანის თქმით, თურქეთი უზრუნველყოფს იდლიბში უსაფრთხო ზონის ჩამოყალიბებას, რომლითაც თავისი ქვეყნის საზღვრებს დაიცავს.

„ მე ღიად ვკითხე პუტინს: რას აკეთებთ იდლიბში. თუ შენ გინდა სამხედრო ბაზის შექმნა, შექმენი, თუმცა გადადი თურქეთის გზიდან“.

ერდოღანმა განაცხადა, რომ პარასკევს ღამით თურქეთის შეიარაღებული ძალების მიერ განხორციელებული საარტილერიო და საჰაერო დაბომბვების შედეგად განადგურებულია ქიმიკატების საწყობი, რომელიც სავარაუდოდ, გამოიყენებოდა სირიული ავიაციის მიერ ქიმიური თავდასხმების დასაორგანიზებლად.