უკრაინა არ აპირებს, 2020 წლის 9 მაისს ე.წ „გამარჯვების დღე“ აღნიშნოს - ამის შესახებ ტელეარხ „Украина 24“-თან ინტერვიუს დროს განაცხადა ქვეყნის საგარეო საქმეთა მინისტრმა, ვადიმ პრისტაიკომ.

„ჩვენ, როგორც მთელი ევროპული კონტინენტი, 75 წლის შემდეგ მზად ვართ, გავიხსენოთ და გავაანალიზოთ თუ რატომ მოხდა ეს ტრაგედია, რომელიც ერთმანეთს უნდა ვაპატიოთ და შევუნდოთ“ - განაცხადა პრისტაიკომ. მისი თქმით, სწორედ ამ მიმართულებით უნდა ხდებოდეს საზეიმო განწყობის ჩამოყალიბება.

2019 წლის აგვისტოში კრემლში დაანონსეს, რომ უკრაინის პრეზიდენტ ვოლოდიმირ ზელენსკის დაპატიჟებდნენ მოსკოვში ნაციზმზე გამარჯვების 75 წლისთავის აღნიშვნის საზეიმო ღონისძიებაზე, თუმცა პრეზიდენტის ადმინისტრაციის განცხადებით, მათ ჯერ არ მიუღიათ ოფიციალური მოწვევა რუსეთის ხელისუფლების მხრიდან.

შეგახსენებთ, რომ უკრაინა 2015 წლიდან არ აღნიშნავს „გამარჯვების დღეს“ 9 მაისს. მთავრობის გადაწყვეტილებით საზეიმო ღონისძიების თარიღი და დასახელება შეიცვალა- უკრაინაში „ნაციზმზე გამარჯვების დღე“ აღინიშნება ყოველი წლის 8 მაისს.

2015 წლის მაისიდან ქვეყანამ მიიღო კანონი “კომუნისტური და ნაცისტური რეჟიმების დაგმობის შესახებ“, რომლის ფონზეც აიკრძალა საბჭოთა სიმბოლიკის პროპაგანდა.