NATO სრულად სოლიდარულია თურქეთის მიმართ და მოუწოდებს რუსეთს და სირიას, შეაჩეროს აგრესიული ქმედებები იდლიბში

მსოფლიო - 17:23, 28 Feb, 2020

1227

28 თებერვალს, ვაშინგტონის შეთანხმების მეოთხე მუხლის თანახმად, თურქეთის მოთხოვნით, ჩრდილოატლანტიკური საბჭოს სხდომა გაიმართა, რომელსაც NATO-ს წევრი 29-ვე სახელმწიფოს ელჩი ესწრებოდა. სხდომას ნატოს გენერალური მდივანი იენს სტოლტენბერგი ხელმძღვანელობდა. ინფორმაცია ალიანსის ოფიციალურ ვებ-გვერდზეა განთავსებული.

სხდომაზე ალიანსის წევრებმა თანაგრძობა გამოუცხადეს თურქეთს და იდლიბის რეგიონში დაღუპული ჯარისკაცების ოჯახებს. ამასთან, NATO-ს წევრმა სახელმწიფოებმა ერთხმად დაგმეს ასადის რეჟიმისა და მისი მხარდაჭერი რუსეთის აგრესიული ქმედებები იდლიბში არაარჩევითი საჰაერო დარტყმების განხორციელების გამო და მოუწოდეს მათ შეწყვიტონ შეტევა, პატივი სცენ საერთაშორისო სამართალს და ხელი შეუწყონ გაეროს ვითარების მშვიდობიან მოგვარებაში.

ამათან, იენს სტოლტენბერგის განცხადებით, ალიანსი სხვადასხვა ზომებს მიიღებს თურქეთის საჰაერო თავდაცვისუნარიანობის გაძლიერების მიმართულებით.

შეგახსენებთ, რომ ზ.ა. შეთანხმების მე-4 მუხლის შესაბამისად, NATO-ს წევრ ნებისმიერ სახელმწიფოს შეუძლია მოიწვიოს საგანგებო საკონსულტაციო შეხვედრა თუ იგი თვლის, რომ მის ტერიტორიულ მთლიანობას, პოლიტიკურ დამოუკიდებლობასა და უსაფრთხოებას საფრთხე ემუქრება.