შპს „საქართველოს საერთაშორისო აეროპორტების გაერთიანებამ“ აეროპორტებისთვის თერმული კამერებისა და თანმდევი მომსახურების დაჩქარებული წესით შესასყიდი თანხმობის მისაღებად შესყიდვების სააგენტოს დღეს, 27 თებერვალს მიმართა.

„გადაუდებელი აუცილებლობიდან“ გამომდინარე, გადაუდებელი აუცილებლობა კი კორონავირუსის საქართველოში შესაძლო გავრცელებაზე ოპერატიული რეაგირების საჭიროებით ახსნა.

მათივე ინფორმაციით, დაგეგმილია 4 ერთეული თერმული კამერის შეძენა თავისი აქსესუარებით და ინსტალაციით. კამერები დამონტაჟდება თბილისის, ქუთაისისა და ბათუმის საერთაშორისო აეროპორტებში.

ამასთანავე, შესყიდვების სააგენტოს ოფიციალურ ვებგვერდზე ატვირთული ინფორმაციით, „საქართველოს საერთაშორისო აეროპორტების გაერთიანება“ თერმულ კამერებს შპს „ენ თი ჯი ჯგუფისგან“ 135 365 ლარად შეისყიდის.

ხელშეკრულების თანახმად, კომპანია ვალდებულია, შემსყიდველის მოთხოვნიდან შვიდ სამუშაო დღეში, თერუმული აპარატები დაამონტაჟოს.

შპს „საქართველოს საერთაშორისო აეროპორტების გაერთიანება“ საქართველოს ფინანსთა და ეკონომიკის სამინისტროს დაქვემდებარებული ორგანიზაციაა.