ერდოღანი პირობას დებს, რომ თურქული შეიარაღებული ძალები სირიაში, იდლიბის პროვინციიდან უკან არ დაიხევენ. ამის შესახებ პრეზიდენტმა თურქეთის პარლამენტში თავისი პარტიის წევრების წინაშე გამოსვლისას განაცხადა.

მან ღიად დაადანაშაულა სირიის არმია იდლიბის თურქულ სადამკირვებლო- სამხედრო პოსტებზე განხორციელებულ თავდასხმაში. მისი აზრით, ასადის ძალების აგრესია სოჭის სამშვიდობო შეთანხმების უხეში დარღვევაა, რომლითაც სირიის აღნიშნული პროვინცია გამოცხადდა დემილიტარიზებულ ზონად.

ერდოღანის განცხადებით, ანკარის მიერ დამასკოსთვის მინიჭებული დრო თავისი სამხედროების გასაყვანად თურქული სადამკვირვებლო პოსტების ზონიდან უკვე იწურება. მან არაერთხელ აღნიშნა, რომ თურქეთი „ყველაზე პატარა“ უკან დახევის ფაქტსაც გამორიცხავს.

საკანონმდებლო ორგანოში გამოსვლისას მან არაერთხელ გაიმეორა, რომ სირიის არმიას რამდენიმე დღე დარჩა მხოლოდ, რომ თებერვლის ბოლოდან გაიყვანოს თავისი საჯარისო შენაერთები თურქული ჯარის საკონტაქტო ზონიდან.

„ ჩვენ გვინდა შევახსენოთ მათ, ვინც თავისი დღის წესრიგის ფონზე ფიქრობს თურქეთის მომწყვდევას კუთხეში, რომ აქ არ ვართ სტუმრები, არამედ ჩვენ ამ ტერიტორიის მეპატრონეები ვართ“ - აღნიშნა ერდოღანმა.

„ჩვენ გადავწყვეტთ საჰაერო სივრცის პრობლემას ძალიან მალე. ამ მხრივ ყველაფერი გადაწყვეტილი და განსაზღვრული გვაქ, მზად ვართ ნებისმიერი მსხვერპლშეწირვისთვის“.

შეგახსენებთ, რომ უკანასკნელი დღეების განმავლობაში საგრძნობლად დაიძაბა სიტუაცია ჩრდილოეთ სირიის ტერიტორიაზე, კერძოდ კი იდლიბის რეგიონში, სადაც დამასკოს დაქვემდებარებაში არსებული საჯარისო შენაერთები რუსული ავიაციის მხარდაჭერით აქტიურად უტევენ იდლიბის პროვინციას, სადაც თურქი სამხედროები და მათ მიერ მხარდაჭერილი ჯგუფები იმყოფებიან.

ბოლო ორი დღის მანძილზე სირიული და რუსული ავიაციის სასტიკი დაბომბვების მიუხედავად, ვერ მოხერხდა თურქული არმიის განდევნა დასახლებულ პუნქტ ნეირაბიდან. ბრძოლები ამ დრომდე მიმდინარეობს, რუსული ავიაცია აქტიურად იყენებს სხვადასხვა საშუალებებს, მათ შორის ვაკუუმის ბომბებსა და რაკეტებს, რომლებიც არაბირთვულ საავიაციო-საბრძოლო ამუნიციიდან ყველაზე ძლიერად ითვლება დღეს რუსული არმიის შემადგენლობაში.