NATO-ს საპარლამენტო ასამბლეის პრეზიდენტი, ატილა მეშტერჰაზი საქართველოში ბოლო პერიოდში მიმდინარე მოვლენებს გამოეხმაურა. ამის შესახებ გამოქვეყნებულია ოფიციალური განცხადება ნატოს საპარლამენტო ასამბლეის ოფიციალურ გვერდზე.

ნატოს საპარლამენტო ასამბლეის თქმით, უწყება (ნატოს საპარლამენტო ასამბლეამ) აღიარებს საქართველოს სწრაფვას ნატოში გაწევრიანებისაკენ და მხარს უჭერს მას ამ გზაზე, განსაკუთრებით მჭიდრო დიალოგისა და საქართველოს პარლამენტთან აქტიური თანამშრომლობის გზით.

„ამავდროულად, მინდა შეგახსენოთ, რომ ნატო დაფუძნებულია დემოკრატიის, ინდივიდუალური თავისუფლებისა და კანონის უზენაესობაზე დაფუძნებული. თავისუფალი და სამართლიანი საარჩევნო გარემო, მიუმხრობელი და დამოუკიდებელი სასამართლო სისტემა არის ალიანსში ინტეგრაციის გზაზე უმნიშვნელოვანესი კომპონენტი. მომავალი საპარლამენტო არჩევნები არის შესაძლებლობა საქართველოსთვის დემოკრატიული ვალდებულებების შესრულების კუთხით. მწუხარებას გამოვთქვამ, რომ 2020 წლის არჩევნებისთვის პროპორციულ სისტემაზე გადასვლის პირობა ანულირებული იქნა გასულ ნოემბერს. ეს საქართველოს დემოკრატიისთვის უკან გადადგმული ნაბიჯი იყო“ - განაცხადა ნატოს საპარლამენტო ასამბლეის პრეზიდენტმა.

მისი განცხადებით, უზენაესი სასამართლოს მიერ გამოტანილი განაჩენი გიგი უგულავასთან დაკავშირებით ბადებს შეკითხვებს და აღრმავებს შეშფოთებას. მეშტერჰაზი ხაზგასმით აღნიშნავს, რომ ზემოხსენებული მოვლენა ოპოზიციასა და მთავრობას შორის პოლიტიკურ დიალოგს რისკის ქვეშ აყენებს და აღრმავებს პოლიტიკური პოლარიზაციისა და დაძაბულობის პროცესს.

„მე მოვუწოდებ საქართველოს მთავრობას, შექმნას ისეთი მდგომარეობა, რომ განახლდეს დიალოგი უმრავლესობასა და ოპოზიციურ პოლიტიკურ პარტიებს შორის, რათა აღდგეს ქართველ ხალხში ნდობის შეგრძნება, რომელიც იქნება იმის გარანტორი, რომ 2020 წლის საპარლამენტო არჩევნები ჩატარდება საერთაშორისო სტანდარტების დაცვით.“

„ მე ყველაფერს გავაკეთებ, რათა მოხდეს საქართველოსთვის ასამბლეის მხრიდან მხარდაჭერა აღნიშნულ პროცესში. მე ველოდები ველოდები საქართველო-NATO-ს საპარლამენტო საბჭოს შემდეგ შეხვედრაზე ბოლო მოვლენების განხილვას“ - განაცხადა ნატოს საპარლამენტო ასამბლეის ხელმძღვანელმა.