''გაგახარებთ და გეტყვით, რომ ცოტნეს მდგომარეობა, ნელი ტემპით, მაგრამ დღითიდღე უმჯობესდება''- ანა ჯაბაური

საზოგადოება - 10:19, 25 Feb, 2020

1006

საქართველოს პირველი პრეზიდენტის ზვიად გამსახურდიას შვილის, ცოტნე გამსახურდიას ჯანმრთელობის მდგომარეობა გაუმჯობესდა, ინფორმაციას მისი ცოლი სოციალურ ქსელში ავრცელებს, მისივე თქმით, ცოტნეს მდგომარეობა ნელი ტემპით, მაგრამ დღითიდღე უმჯობესდება, კონტაქტურია, მას ასევე უტარდება სარეაბილიტაციო თერაპიაც.

''ცოტნეს გულშემატკივართა გულწრფელი ინტერესის გამო, მოკლედ მოგახსენებთ მისი ჯანმრთელობის ამჟამინდელი რეალური მდგომარეობის შესახებ. გაგახარებთ და გეტყვით, რომ ცოტნეს მდგომარეობა, მართალია, ნელი ტემპით, მაგრამ დღითიდღე უმჯობესდება. დიდი ხანია დაძლია ყველანაირი ინფექცია. ტემპერატურა და ჰემოდინამიკური მაჩვენებლებიც ნორმის ფარგლებში აქვს. ჯერ-ჯერობით არავერბალურად, მაგრამ მაინც კონტაქტურია. ესმის კარგად და ასევე კარგად ასრულებს მარტივ მოქმედებებს, ცდილობს ემოციების გამოხატვას. მართვითი სუნთქვიდანაც დიდი ხანია მოხსნილია. მართალია, წინ კიდევ ბევრი ბრძოლა გველის, მაგრამ პროგრესი იმდენად თვალსაჩინოა, რომ ყველა ექიმი მხოლოდ პოზიტიური პროგნოზისადმი არის განწყობილი. ორი დღის წინ ჩაუტარდა განმეორებითი მრტ, რომელზეც აღინიშნა დადებითი დინამიკა. აქვე მინდა აღვნიშნო, რომ ცოტნეს უტარდება სწორი მკურნალობა და ყველა საჭირო პროცედურა რამდენიმე ექიმისა და ექთნის მეთვალყურეობის ქვეშ. დიდი ხანია დაწყებული აქვს სარეაბილიტაციო თერაპიაც. აღარაფერს ვამბობ ზედმიწევნით დაცულ ჰიგიენის ნორმებზე ასე, რომ იმედით შევყურებთ მომავლს.’’ - წერს ანა ჯაბაური საკუთარ სოციალურ ქსელში.

შეგახსნებთ, რომ ცოტნე გამსახურდია 2019 წლის 19 დეკემბერს მძიმედ დაჭრეს. მას თბილისში რამდენიმე ოპერაცია ჩაუტარდა, რის შემდეგაც, თურქეთის კლინიკაში გადაიყვანეს.