სოლიდარობის უპრეცენდენტო მაგალითი - უკრაინის ჯანდაცვის მინისტრი ჩინეთიდან ევაკუირებულ თანამოქალაქეებთან ერთად კარანტინს გაივლის

მსოფლიო - 10:47, 21 Feb, 2020

1776

უკრაინის ჯანდაცვის მინისტრის ზორიანა სკალეტსკას თქმით, ის ჩინეთიდან ევაკუირებულ უკრაინის მოქალაქეებთან ერთად კარანტინს გაივლის სოლიდარობის ნიშნად.
„გადავწყვიტე, რომ შევუერთდები იმ ადამიანებს, რომლებიც დაკვირვების ქვეშ იმყოფებიან. მე მომავალ 14 დღეს მათთან ერთად გავატარებ იმავე ტერიტორიაზე და იმავე პირობებში, როგორშიც ისინი იმყოფებიან“,- განაცხადა მინისტრმა.
სკალეტსკას თქმით, მისი იქ ყოფნა დაამშვიდებს ადგილობრივ მოსახლეობას, რომელიც ქალაქ ნოვი სანჟარიში ევაკუირებულების მოთავსებას აპროტესტებს. „ის რაც დღეს ხდებოდა - პანიკა და ნულოვანი ტოლერანტობა, ნიჰილიზმი და აგრესია - ამ ყველაფერმა ძალიან უარყოფითი შთაბეჭდილება მოახდინა ჩემზე. ის ადამიანები, რომლებიც ჩინეთიდან ჩამოიყვანეს, კიდევ უფრო დათრგუნული არიან. მე გთხოვთ, მადლობა გადაუხადოთ მათ, რომ ისინი დათანხმდნენ იზოლაციაში ყოფნას ყველა ჩვენთაგანის უსაფრთხოების გამო“, - აღნიშნა მინისტრმა.
შეგახსენებთ, რომ დღეს ქალაქ ნოვიე-სანჟარიში ათეულობით ადამიანი შეიკრიბა, რომლებიც აცხადებდნენ, რომ ჩინეთიდან მოქალაქეების ევაკუაცია ქალაქში ვირუსის გავრცელებას გამოიწვევდა. მათ ავტობუსებს ქვები დაუშინეს, საბურავები დაწვეს და გზები გადაკეტეს.