ამერიკაში დააკავეს მექსიკის მოქალაქე, რომელიც რუსეთის უშიშროებისთვის მომუშავე აგენტი აღმოჩნდა. ამის შესახებ ინფორმაციას აშშ-ს იუსტიციის დეპარტამენტი ავრცელებს. უწყების განცხადებაში აღნიშნულია, რომ აშშ-ში მყოფი მექსიკის მოქალაქე, ექტორ ალეხანდრო კაბრერა ფუენტესი მოქმედებდა რუსეთის დაზვერვის სასარგებლოდ. ამის შესახებ წერს NBC-ი.

ცხადდება ინფორმაცია იმის შესახებ, რომ ფუენტესი დაქირავებული იყო რუსეთის მთავრობის მოქმედი ერთ-ერთი მაღალჩინოსნის მიერ. დავალების თანახმად, მექსიკელ აგენტს უნდა დაექირავებინა საცხოვრებელი მაიამიში, რომლის შესახებაც არ უნდა ეცნობებინა თავისი ოჯახისთვის.ამის შემდეგ ფუენტესი წავიდა რუსეთში და მის ზემდგომ პირებთან ერთად განიხილა დავალების დეტალები.

იუსტიციის დეპარტამენტის თქმით, რუსეთის მთავრობის წევრმა ფუენტესს მიაწოდა ინფორმაცია ამერიკის მთავრობის წარმომადგენლის მანქანის შესახებ, რომლის ადგილმდებარეობა "აგენტს'' უნდა დაედგინა, მოეპოვებინა ობიექტის სატრანსპორტო საშუალების სანომრე ნიშანი და აღენიშნა ავტომობილის ფიზიკური ადგილმდებარეობა.

ფუენტესი შევიდა იმ საცხოვრებელ ზონაში, სადაც ამერიკის მთავრობის წარმომადგენელი ცხოვრობდა გასულ ხუთშაბათს. იგი დაცვამ შეაჩერა,რადგან ვერ დაასახელა სწორად იმ ადამიანის სახელი და გვარი ვის სანახავადაც იყო მოსული, ამასობაში კი მისმა ცოლმა გადაუღო ფოტოები ამერიკის მთავრობის წევრის მანქანის სანომრე ნიშნებს.

თავის რუს ხელმძღვანელებთან ამ წლის აპრილში ან მაისში უნდა გამართულიყო შეხვედრა, რომლის დროსაც მას ამერიკის სამთავრობო პირის შესახებ მოპოვებული ინფორმაცია უნდა წარედგინა დამკვეთებისთვის. 2020 წლის 16 თებერვალს ფუენტესი მაიამის საერთაშორისო აეროპორტში დააკავეს მაშინ, როდესაც იგი მეხიკოში მიდიოდა. სამართალდამცავთა თქმით, ამერიკელი მაღალჩინოსნის სანომრე ნიშნები იქნა აღმოჩენილი მექსიკელის ტელეფონში, WHATSAPP-ის აპლიკაციაში, რომლის შემდეგაც მამაკაცმა აღიარა პოლიციელებთან საუბრისას, რომ მან აღნიშნული ოპერაცია რუსეთის მთავრობის დავალებით განახორციელა.