პრაღაში იმ ქუჩასა და მოედანს სახელს გადაარქმევენ, სადაც რუსეთის საელჩო მდებარეობს. გავრცელებული ინფორმაციით, მას რუსეთის მთავრობის ყოფილი ოპოზიციონერი პოლიტიკოსის, ბორის ნემცოვის სახელს დაარქმევენ. ამის შესახებ წერს რადიო თავისუფლება.

ჩეხური მედიის ინფორმაციით, 27 თებერვლისთვის შესაძლოა ქალაქის საკრებულომ მიიღოს გადაწყვეტილება, რომლის თანახმადაც პოდ კაშტანის მოედანს სახელად დაერქმევა ბორის ნემცოვის მოედანი, რაც მისი მკვლელობის მე-5 წლისთავს მოხდება.

ჩეხეთის იმ ძირითადმა პარტიებმა, რომლებიც პრაღის საკრებულოში არიან წარმოდგენილნი, მხარი დაუჭირეს აღნიშნულ ცვლილებას.

2018 წლის თებერვალში ბორის ნემცოვის მოედანი გაიხსნა ვაშინგტონში იმ ქუჩაზე სადაც რუსეთის საელჩო მდებარეობს. აღნიშნული ქმედება აგრეთვე გაიმეორეს ლიტვის დედაქალაქში, ვილნიუსში.

შეგახსენებთ, რომ ბორის ნემცოვი, რომელიც პუტინის მთავარი კრიტიკოსი და ოპოზიციური გაერთიანების ლიდერი იყო, მოკლეს 2015 წლის 27 თებერვალს მოსკოვში, კრემლის წინ ხიდზე.