"მჯერა, რომ უფალი ჩემს შვილებს არ მიატოვებს და მათ დასახმარებლად გამოჩნდებიან კეთილი ადამიანები!"- რა პირობებში ცხოვრობდა გორგოძეების ოჯახი, რომელიც ხანძარს ემსხვერპლა

საზოგადოება - 10:23, 04 Feb, 2020

1744

ბაღდათში მომხდარმა ტრაგედიამ მთელი საქართველო. გვიან ღამე გავრცელდა ცნობა, რომ წერეთლის ქუჩაზე ერთ-ერთ საცხოვრებელ სახლში გაჩენილ ხანძარს გორგოძეების ოჯახის 5 წევრი და მათი ახლობელი ემსხვერპლა. ახალგაზრდა ქალი მეხუთე შვილს ელოდებოდა. მთლიანად დაიწვა 4 არასრულწლოვანი.
ირკვევა, რომ მიტოვებულ სახლში შვიდსულიანი, სოციალურად დაუცველი ოჯახი თვითნებურად იყო შესახლებული.

შემთხვევის დროს სახლში არ იმყოფებოდნენ დაღუპული ბავშვების მამა და ბებია. ადგილობრივების ინფორმაციით, მაღაზიიდან დაბრუნებული ბებია ხანძარს შეესწრო, თუმცა ცეცხლი იმდენად ძლიერი იყო, ვერცერთის გამოყვანა ვერ შეძლო ხანძრიდან.
მეზობლების თქმით, ბავშვების მამამ ცოლ-შვილი სახლში დაძინებული დატოვა, დაბრუნებულს კი ეს შემზარავი ტრაგედია დახვდა.

გორგოძეების მრავალშვილიანი ოჯახის შესახებ რამდენიმე თვის წინ "ნიუპოსტი" ჩერნოვეცკის ფონდზე დაყრდნობით წერდა.
გთავაზობთ ამ ინტერვიუს:
"გორგოძეების მრავალშვილიანმა ოჯახმა უკვე დიდი ხანია, რაც სიღარიბის ზღვარს გადააბიჯა. ეს ბავშვები, რომლებსაც თქვენ ფოტოზე ხედავთ მოკლებულნი არიან ნორმალურ საჭმელს და წამლებს, ტანსაცმელსა და სათამაშოებს. ისინი საშინელ სიდუხჭირეში ცხოვრობენ და თუ საზოგადოება დროულად არ დაეხმარება, მათ განვითარების შანსი არ გააჩნიათ. მთელი ოჯახი შეყუჟულია ერთ პატარა გაპარტახებულ ოთახში, სადაც არც წყალია და არც გაზი, არც გათბობა და არც ავეჯი. იქ მხოლოდ რკინის 2 საწოლი დგას, რომლებიც იმავდროულად მაგიდის ფუნქციასაც ითავსებენ.

ბაღდათის ადგილობრივი ხელისუფლება, როგორც ჩანს, გულგრილია ამ ოჯახის გასაჭირის მიმართ, ამ ბავშვების ბედი არც მერიას აინტერესებს და არც მაჟორიტარ დეპუტატს.

ჩვენ ვესაუბრეთ მრავალშვილიან დედას ნარგიზა გორგოძე-გველესიანს:

- რამდენი წელია ამ შენობაში ცხოვრობთ?

ნარგიზა: ეს ყოფილი სტამბის შენობაა. სახელმწიფომ შეგვასახლა აქ.

-დროებით?

ნარგიზა: არა, საკუთრებაში გადმოგცეს. დიდი მადლობა ამისთვის, მაგრამ გამომდინარე იქიდან, რომ მატერიალურად უაღრესად გვიჭირს,

-რატომ?

ნარგიზა: მე და ჩემს მეუღლეს არ გაგვაჩნია არანაირი პროფესია, ამიტომ სამსახურსაც ვერ ვშოულობთ. თუ გამოჩნდა რაიმე ერთჯერადი სამუშაო, ჩემი ქმარი არ უშვებს შანსს ხელიდან, რომ როგორმე მცირეოდენი თანხა მაინც შემოიტანოს ოჯახში.

-რა წარმოადგენს თქვენი ოჯახის შემოსავალს?

ნარგიზა: სოციალური შემწეობის თანხა, რომლის ლომის წილი პროდუქტებზე მიდის. ზამთარში შეშის ყიდვაც გვიწევს, რაც ძალიან ძვირია ჩვენთვის.

-თქვენი მაჟორიტარი დეპუტატი თუ გეხმარებათ? ხომ არ მიგიმართავთ მისთვის დახმარების თხოვნით?

ნარგიზა: არა, არ მიგვიმართავს. თქვენ მოგმართავთ ახლა, რომ გაგვიწიოთ შუამდგომლობა დეპუტატთან, რომ მოგვაქციოს მან ყურადღება.

-არიან ადამიანები, რომლებიც აკრიტიკებენ მრავალშვილიან ოჯახებს, რომლებსაც მატერიალურად უჭირთ. თქვენ რას ფიქრობთ ამის შესახებ?

ნარგიზა: მე ქრისტიანი ვარ და ვფიქრობ, რომ დაუშვებელია ბავშვის ჩანასახში მოკვლა. ბავშვები - ეს ქვეყნის მომავალია! მე მჯერა, რომ უფალი ჩემს შვილებს არ მიატოვებს და მათ დასახმარებლად გამოჩნდებიან კეთილი ადამიანები!

-რა გჭირდებათ ამ ეტაპზე ყველაზე მეტად?

ნარგიზა: არ გვაქვს ტელევიზორი, მაცივარი, გამათბობელი, სარეცხი მანქანა...".