ლიბიის ამბოხებული გენერალი ტრიპოლის აეროპორტიდან აფრენილი თვითმფრინავების ჩამოგდებით იმუქრება

მსოფლიო - 11:53, 23 Jan, 2020

1251

ლიბიაში, მიტიგის საერთაშორისო აეროპორტი ფრენებს აუქმებს მას შემდეგ, რაც ამბოხებულმა გენერალმა, ჰალიფა ჰაფთარმა განაცხადა, რომ დედაქალაქი ტრიპოლის გარშემო არსებული საჰაერო სივრცე არასაფრენ ზონად ცხადდება. იგი აღნიშნავს, რომ ჩამოაგდებს ყველა თვითმფრინავს, სამოქალაქოების ჩათვლით, რომელიც ეცდება აეროპორტიდან გასვლა-შემოსვლას. ამის შესახებ წერს DAILY NEWS-ი.

ჰაფთარის ძალების სპიკერის განცხადებით, სამხედროებმა ქალაქი ტრიპოლის გარშემო 90 კილომეტრიანი სივრცე არასაფრენ ზონად გამოაცხადეს, რომელშიც მიტიგას საერთაშორისო აეროპორტიცაა მოქცეული. მისი თქმით, ნებისმიერი თვითმფრინავი ზემოხსენებულ ზონაში წარმოადგენს პოტენციურ სამიზნეს მათი საზენიტო აპარატებისთვის, რის გამოც ურჩევენ ყველას, თავი შეიკავონ ფრენებისგან. 22 იანვარს ღამით მიტიგას აეროპორტი გრადის ექვსი რაკეტით იქნა დაბომბილი ჰაფთარის ძალების მხრიდან.

შეგახსენებთ, რომ ლიბიაში სამოქალაქო ომია, სადაც ერთმანეთს უპირისპირდებიან ამბოხებული გენერალი ჰაფთარის სამხედრო ძალები და გაეროს მიერ ოფიციალურად აღიარებული ფაიეზ ალ-სარაჯის ხელისუფლება. 12 იანვარს გაფორმდა ცეცხლის შეწყვეტის შეთანხმება მას შემდეგ, რაც დაპირისპირებული მხარეები მოლაპარაკების მაგიდასთან დასვეს თურქეთისა და რუსეთის ლიდერებმა, თუმცა მიუხედავად ამისა, ცეცხლის შეწყვეტის მოლაპარაკება შეთანხმებით ვერ დასრულდა, რის გამოც ჰაფთარმა დატოვა შეხვედრა მოსკოვში და ხელი არ მოაწერა დაზავების დოკუმენტს.