რადიო თავისუფლება ფეისბუქზე აქვეყნებს ვიდეოს, სადაც ასახულია აფხაზეთის ე.წ ოპოზიციური პოლიტიკური პარტიის ერთ-ერთი აქტიური მხარდამჭერისა და საპროტესტო აქციების ორგანიზატორის მოღვაწეობა.

როგორც ვიდეოკადრებით ირკვევა, აფხაზეთის ე.წ პრეზიდენტის რაულ ხაჯიმბას პოლიტიკური გუნდის მოწინააღმდეგე და ქუჩის აქციების ლიდერი, ახრა ავიძბა იბრძოდა დონბასში უკრაინის ცენტრალური ხელისუფლების წინააღმდეგ, სადაც ერთ-ერთი აფხაზური სამხედრი დაჯგუფების „პიატნაშკას“ ხელმძღვანელი იყო .

ვიდეოში ჩანს 2014-2015 წლებში აღმოსავლეთ უკრაინაში მიმდინარე სამხედრო ბატალიების კადრები, რა დროსაც აფხაზი პოლიტიკური მოღვაწე და რუსეთის მიერ დაქირავებული მებრძოლი აქტიურად იყო ჩაბმული ქუჩის ბრძოლებში. უკრაინული მედიის ინფორმაციით, რუსული ტელევიზიები ეწეოდდნენ პროპაგანდას ავიძბას ფიგურის გაპიარებისათვის- მასზე და მის თანამებრძოლებზე არაერთი რეპორტაჟი მოამზადეს, სადაც ზემოხსენებული მებრძოლი გამოყვანილია, როგორც თავისუფლებისათვის ბრძოლის სიმბოლოდ. უკრაინელი ჟურნალისტები აცხადებენ, რომ მას შემდეგ, რაც ცნობილი რუსი ბოევიკები, „გივი“ და „მოტოროლა“ მოკლეს კიევის მიერ მართულმა სპეცსამსახურებმა, ავიძბა გაიქცა დონბასიდან, რადგან მან მისივე ფიგურის ცნობადობის გამო საფრთხე იგრძნო უკრაინელი სამხედროების მხრიდან.

ავიძბამ აფხაზეთის უკანასკნელ პოლიტიკურ მოვლენებამდე რამდენიმე წლით ადრე ერთხელ უკვე სცადა პარლამენტში ეყარა კენჭი, თუმცა მისი მცდელობა უშედეგო აღმოჩნდა.

შეგახსენებთ, რომ 2019 წლის იანვარში ოპოზიციურმა პოლიტიკურმა ძალებმა, რომელშიც აქტიურად იყო ჩართული უკრაინის ომის მონაწილე ახრა ავიძბა, მომხრეებს მოუწოდეს, რომ უზენაესი სასამართლოს შენობის წინ მოედანზე შეკრებილიყვნენ, რა დროსაც მთავრობის მხარდამჭერებთან და პოლიციასთან მოხდა დაპირისპირება, რის შემდეგადაც ოპოზიციამ დაიკავა ე.წ პრეზიდენტის ადმინისტრაციის შენობა.

აფხაზეთის ე.წ ხელისუფლების წინააღმდეგ გამართულ რადიკალური ქმედებებში აქტიურად იყო ჩართული ზემოხსენებული მებრძოლი. რამდენიმე დღიანი პოლიტიკური კრიზისა და დაძაბულობის ფონზე, აფხაზეთის ე.წ პრეზიდენტი რაულ ხაჯიმბა დაკავებული თანამდებობიდან გადადგა, რომლის შემდეგაც ხელახალი არჩევნები უნდა დაინიშნოს რუსეთის მიერ საქართველოს ოკუპირებულ რეგიონში.