ჩინეთის ხელისუფლების წარმომადგენლების განცხადებით, ახალმა ვირუსმა, რომელმაც 9 ადაამიანი მოკლა, შესაძლოა მუტაცია განიცადოს და ფართოდ გავრცელდეს. მათი თქმით, ხორციელდება დაავადების ლოკალიზებისთვის საჭირო ზომები, თუმცა აღნიშნული ღონისძიებები არ კმარა მის შესაჩერებლად. ამის შესახებ წერს BBC-ი.

კორონავირუსით დაინფიცირების 440 შემთხვევა დაფიქსირდა მას შემდეგ, რაც დაავადება გავრცელდა ქალაქი ვუჰანის ბაზრიდან ჩინეთის სხვადასხვა პროვინციებში, ტაილანდში,სამხრეთ კორეასა და ამერიკის შეერთებულ შტატებში.

ჩინეთის სამთავრობო უწყებები აცხადებენ, რომ ქვეყანა ამჟამად ყველაზე კრიტიკულ სტადიაში იმყოფება დაავადების პრევენციისა და კონტროლის მხრივ. მედიკოსების თქმით, ადამიანიდან ადამიანზე სასუნთქი გზებით ვირუსის გადადების რამდენიმე შემთხვევა უკვე დადასტურდა.