ბრიტანელმა სპეცრაზმელმა ერაყში ჩატარებული ანტიტერორისტული ოპერაციის ფარგლებში BENELI M4-ის ტიპის ცეცხლსასროლი იარაღით ისლამური სახელმწიფოს ხუთი ჯიჰადისტი შვიდ წამში მოკლა, რა დროსაც თავისი სპეციალური სამხედრო ჯგუფის წევრები სიკვდილისგან იხსნა.

აღნიშნული შემთხვევა მოხდა ბაღდადში- ბრიტანული ავიაციის თორმეტმა სამხედრომ, რომელიც გაერთიანებული სამეფოს დაზვერვის სამსახურის, MI6-ის აგენტების ჯგუფთან ერთად მოქმედებდა, ჩაატარა სპეცოპერაცია ბაღდადთან მდებარე ისლამური სახელმწიფოს საგუშაგოზე. სამხედროებმა მიიღეს სადაზვერვო ინფორმაცია ქალაქში არსებულ ხელნაკეთი ბომბების დამამზადებელი ე.წ ქარხნის არსებობაზე.

გავრცელებული ინფორმაციით, ტერორისტთა ადგილსამყოფელის რამდენიმე დღიანი დათვალიერების შემდეგ გაირკვა, რომ თვითმკვლელი ტერორისტები აპირებდნენ ბომბების აფეთქებას.

სპეცოპერაცია დაიწყო გამთენიამდე- ბრიტანელი სამხედროები შენობაში შეჭრისთანავე ძლიერ შეიარაღებულ წინააღმდეგობას წააწყდნენ. Dailystar-ის ინფორმაციით, ცეცხლსასროლი ავტომატური თოფით ერთ-ერთმა სამხედრომ საცხოვრებელში შეჭრისთანავე გახსნა ცეცხლი, რა დროსაც ადგილზე მოკლა სამი "შაჰიდისქამრიანი" ტერორისტი, რომლებმაც ბომბის აფეთქება ვერ მოასწრეს. ამავე სამხედრომ რამდენიმე წამის შემდეგ მორიგი ორი ბოროტმოქმედიც მოკლა. ერთ-ერთი ანონიმი ჯარისკაცი მიერ მედიისთვის მიწოდებული ინფორმაციით, სროლები ერთმანეთისგან რამდენიმე მეტრში მიმდინარეობდა ტერორისტებსა და ბრიტანელ სპეცრაზმელებს შორის. რამდენიმე წუთიანი უწყვეტი ცეცხლის შემდეგ ჯიჰადისტები დანებდნენ ბრიტანელ სამხედროებს მას შემდეგ, რაც აღმოაჩინეს, რომ რამდენიმე მათ თანამებრძოლს თავი აღარ ჰქონდათ.