ზაზა სარალიძის შეცვლილი რიტორიკა - როგორ შეხვდა შვილმოკლული მამა შოთაძის გენ.პროკურორად შესაძლო დანიშვნას

საზოგადოება - 16:55, 16 Jan, 2020

1968

ხორავას ქუჩაზე მოკლული დათუნა სარალიძის მამა, ზაზა სარალიძე ირაკლი შოთაძის გენერალურ პროკურორად არჩევას ეხმაურება.

შვილმოკლული მამა, რომელიც 2 წლის წინ, როცა შოთაძე მთავარი გამომძიებლის სკამს იკავებდა, ყველაზე მეტი კითხვა სწორედ შოთაძესთან ჰქონდა და მის გადადგომას მოითხოვდა. დღეს კი სარალიძემ თქვა, რომ მისთვის "არანაირ მნიშვნელობას არ წარმოადგენს ბატონი ირაკლი შოთაძის გენპროკურორად დაბრუნება".

მეტიც, სარალიძემ სოციალურ ქსელში დაწერა, რომ ამ საქციელით შოთაძეს სურს დაგვანახოს თავისი უდანაშაულობა დათუჩა სარალიძის მიმართ.

„მე არაერთხელ მითქვამს, რომ ჩემი ბრძოლის მთავარი მიზანი იყო დამნაშავეების სრული სიმკაცრით დასჯა. დათუჩას საქმეზე კონკრეტული ადამიანების თუ მთავრობის პასუხისმგებლობას ვაყენებდი სწორედ იმის გამო, რომ არ მქონდა სამართლიანობის განცდა, არ მქონდა შეგრძნება, რომ ყველაფერი სწორად მიდიოდა. სამწუხაროდ, ძალიან ბევრმა ჩემი ოჯახის ტრაგედიის გამოყენება პირადი ქულების ჩასაწერადაც კი სცადა! ახლაც გრძელდება ჩემი ოჯახის მიმართ კონკრეტული პირებისგან უსაფუძვლო ბრალდებები. ახლა საქმე მიდის სწორი მიმართულებით. დარწმუნებული ვარ, რომ საბოლოოდ აღდგება სამართლიანობა და ყველა დამნაშავე აუცილებლად, კანონის სრული სიმკაცრით აგებს პასუხს. არ მაქვს არანაირი პრეტენზია, არ მაქვს არანაირი საფუძველი რომ არ ვენდო გამოძიებას ამ ეტაპზე. ამიტომ, ჩემთვის არანაირ მნიშვნელობას არ წარმოადგენს ბატონი ირაკლი შოთაძის გენპროკურორად დაბრუნება. ვფიქრობ,რომ ამ საქციელით მას სურს დაგვანახოს თავისი უდანაშაულობა დათუჩას მიმართ და ღირსეულად ბრძოლის ველზე დაბრუნებად შევაფასებ. დაველოდები მისგან ღირსეულ ნაბიჯებს და აუცილებლად ბოლომდე მივყვები ამ საქმეს, რათა ყველა დამნაშავე სათანადოდ დაისაჯოს და არავინ დარჩეს დაუსჯელი. ყველას დავაფასებ ვინც სიმართლეს დააფასებს“, - წერს ზაზა სარალიძე „ფეისბუქში“.