ირანი უარს აცხადებს ამერიკის შეერთებულ შტატებთან მოლაპარაკებაზე რეგიონში არსებული დაძაბული სიტუაციის დეესკალაციასთან დაკავშირებით. გაეროში ირანის ელჩის, მეჯიდ თაჰთ რავანჩის განცხადებით, ირანი უარს აცხადებს მოლაპარაკების შეთავაზებაზე. ინფორმაციას ავრცელებს არაბული მედია.

მისი თქმით, აღნიშნული პირობა დაუჯერებელი და წარმოუდგენელია, იმ ფონზე რომ დონალდ ტრამპი ირანზე სანქციების დაწესებას განიხილავს.

ირანელი დიპლომატის თქმით, ამერიკელების მიერ ყასიმ სოლეიმანის მკვლელობაზე საპასუხო რეაქციის ფარგლებში დაიბომბა აშშ-ს სამხედრო ბაზა ერაყში, რომლის დროსაც მშვიდობიანი მოქალაქეები არ დაშავებულან.

შეგახსენებთ, რომ 8 იანვარს თეთრ სახლში გამართული საგანგებო ბრიფინგის დროს დონალდ ტრამპმა განაცხადა, რომ არ აპირებს სამხედრო პასუხის გაცემას ირანზე და მზადაა დაუწესოს მძიმე ეკონომიკური სანქციები თეირანს განხორციელებული აგრესიის გამო.