ბრიტანეთის დედოფალი და მისი უახლოესი გარემოცვა ძალზე დამწუხრებული და ღრმად იმედგაცრუებულია სასექსის ჰერცოგისა და ჰერცოგინიის განცხადებით სამეფო ოჯახის წევრობის სტატუსზე უარის თქმასთან დაკავშირებით.

გავრცელებული ინფორმაციით, დედოფალი ელისაბედი წუხს იმ ფაქტზე, რომ არ მოხდა მასთან კონსულტაცია აღნიშნულ საკითხთან დაკავშირებით. ამის შესახებ ინფორმაციას TELEGRAPH-ი ავრცელებს.

ოთხშაბათს გამოქვეყნებული განცხადების თანახმად, სასექსის ჰერცოგმა და ჰერცოგინიამ, პრინცმა ჰარიმ და მეგან მარკლიმ მედიასთან საუბრისას განაცხადეს, რომ ისინი აპირებენ კანადაში საცხოვრებლად გადასვლას და სამეფო ოჯახის წევრობის სტატუსზე უარს თქმას-ამის შესახებ მათ ბრიტანეთის მოსახლეობას ინსტაგრამ პოსტით აცნობეს.

ოჯახის წევრთა თქმით, გამოქვეყნებული განცხადება იყო წყვილის პირადი გადაწყვეტილება, რომელიც ჯერ არ დამტკიცებულა სასახლის მიერ.

ოფიციალური ბუკინგემის სასახლის განცხადებაში ნათქვამია, რომ წყვილის სურვილმა განსხვავებულ მიდგომებთან დაკავშირებით, შექმნა მძიმე რეალობა, რომელსაც დრო დასჭირდება აღნიშნული საკითხის გადასაწყვეტად.

გამოცემაში აღნიშნულია, რომ ეს უპრეცედენტო გადაწყვეტილება შოკისმომგვრელი და ძალზე დამაბნეველი იყო დედოფლისთვის, რომელმაც მძიმე თვეები გადაიტანა, როდესაც „ევედრებოდა“ იორკის ჰერცოგს თავის საჯარო უფლება- მოვალეობებზე უარი ეთქვა ცნობილ პედოფილ მილიარდერთან, ჯეფრი ეფშტეინთან ურთიერთობის გამო.