ოფიციალური ლონდონი გმობს ირანის მხრიდან ერაყში განთავსებულ სამხედრო ბაზებზე სარაკეტო თავდასხმას. ბრიტანეთის პრემიერ მინისტრი ბორის ჯონსონი შეტევას ახასიათებს, როგორც „უგუნურს და სახიფათოს“ და მოითხოვს „სასწრაფო დეესკალაციას“.

შეკითხვაზე, დაშავდა თუ არა ბრიტანელი სამხედრო სარაკეტო თავდასხმის დროს, ბორის ჯონსონმა განაცხადა, რომ თავდასხმის დროს ბრიტანელები არ დაშავებულან. მან ასევე აღნიშნა, რომ დიდი ბრიტანეთი „ყველაფერს აკეთებს რაც შეუძლია“ რათა გააპროტესტოს რეგიონში არსებული სიტუაცია.

მისი თქმით, სოლეიმანი, რომელიც ამერიკელებმა დრონის დახმარებით გასულ კვირას მოკლეს, არაერთ აქტში იღებდა მონაწილეობას, მათ შორის ის შეიარაღებაში ეხმარებოდა ჰუსიტების ჯგუფსა და ჰესბოლას და მხარს უჭერდა ასადის რეჟიმს სირიაში. ბრიტანეთის პრემიერ მინისტრის თქმით, ის ორკესტრირებას უწევდა ბრიტანელი სამხედროების წინააღმდეგ მიმართულ შეტევებსაც.

ბორის ჯონსონი აღნიშნავს, რომ სოლეიმანს „ბრიტანელი სამხედროების სისხლით აქვს ხელი დასვრილი“ და აცხადებს, რომ აშშ-ს ჰქონდა უფლება დაეცვა საკუთარი თავი.

შეგახსენებთ, რომ სოლეიმანი აშშ-ის მიზნობრივი ავიაიერიშის შედეგად, 2020 წლის 3 იანვარს მოკლეს. მასთან ერთად ასევე დაიღუპნენ ერაყის სახალხო მობილიზაციის ძალების წევრები და მისი ხელმძღვანელის მოადგილე აბუ მაჰდი ალ-მუჰანდისი.