სარეაბილიტაციო სამუშაოების გამო ჭავჭავაძის გამზირზე და მიმდებარე ქუჩებზე ამაღამ სატრანსპორტო მოძრაობის სქემა შეიცვლება

საზოგადოება - 18:43, 07 Jan, 2020

1213

ჭავჭავაძის გამზირზე, კავსაძის ქუჩიდან ყიფშიძის ქუჩამდე მონაკვეთზე, 8 იანვრიდან სარეაბილიტაციო სამუშაოების მესამე ეტაპი იწყება, რის გამოც ამაღამ, 01:00 საათიდან, ჭავჭავაძის გამზირსა და მიმდებარე ქუჩებზე სატრანსპორტო მოძრაობის სქემა შეიცვლება. რაც შეეხება სარეაბილიტაციო სამუშაოებს, მოხდება ასფალტის საფარის დემონტაჟი და დაიწყება მიწისქვეშა კომუნიკაციების - წყლისა და წყალარინების, სანიაღვრე ქსელისა და გაზსადენის რეაბილიტაცია. ამის შემდეგ დაიგება ასფალტის საფარის პირველი ფენა. შემდეგი ეტაპი კი ყიფშიძის ქუჩიდან ვაკის პარკამდე მონაკვეთს შეეხება, სადაც ანალოგიური სამუშაოები ჩატარდება.

დაგეგმილი სამუშაოებისა და შეცვლილი სატრანსპორტო სქემის შესახებ მედიას თბილისის მერიის ტრანსპორტის საქალაქო სამსახურის უფროსმა ვიქტორ წილოსანმა და ინფრასტრუქტურის განვითარების საქალაქო სამსახურის უფროსის მოადგილემ ერეკლე სუხიტაშვილმა მიაწოდეს ინფორმაცია.

ჭავჭავაძის გამზირსა და მის მიმდებარე ქუჩებზე ტრანსპორტის მოძრაობის სქემა შემდეგნაირად იცვლება:

ჭავჭავაძის გამზირის კავსაძის ქუჩიდან ყიფშიძის ქუჩამდე მონაკვეთზე ტრანსპორტის მოძრაობა შეიზღუდება, ხოლო თაქთაქიშვილის ქუჩიდან კავსაძის ქუჩამდე მონაკვეთზე ცალმხრივი მოძრაობა დაწესდება.

ვაკის პარკიდან მელიქიშვილის ქუჩას ტრანსპორტი მიშველაძის, აბაშიძისა და პეტრიაშვილის ქუჩების გავლით დაუკავშირდება.

ვარაზისხევიდან ფალიაშვილისა და აბაშიძის ქუჩებზე მოხვედრა კვლავინდებურად შესაძლებელი იქნება ჭავჭავაძის გამზირის ან კეკელიძის ქუჩების მეშვეობით.

ვარაზისხევიდან ვაკის პარკისა და ყიფშიძის ქუჩის მიმართულებით ტრანსპორტი გადაადგილებას ვერ შეძლებს. გმირთა მოედნიდან ვაკის პარკისკენ იგი ამირეჯიბის გზატკეცილისა და თამარაშვილის ქუჩების გავლით იმოძრავებს.

ყიფშიძის ქუჩაზე ტრანსპორტის შესვლა, ასევე, ამ ქუჩიდან ჭავჭავაძის გამზირთან დაკავშირება შესაძლებელი იქნება გალაკტიონის ძეგლის მხრიდან.

ავალიშვილის ქუჩაზე დაწესდება ორმხრივი მოძრაობა. შესაბამისად, ამ ქუჩიდან შესაძლებელი იქნება კავსაძისა და ფალიაშვილის ქუჩების მიმართულებით გადაადგილება.

რამიშვილის ქუჩაზე იმოქმედებს ცალმხრივი მოძრაობის რეჟიმი, ჭავჭავაძის გამზირიდან ამირეჯიბის გზატკეცილის მიმართულებით. აბაშიძისა და ფალიაშვილის ქუჩებიდან რამიშვილის ქუჩასთან დაკავშირება შესაძლებელი იქნება არაყიშვილის ქუჩის გავლით.

დროებით შეიცვლება საზოგადოებრივი ტრანსპორტის მარშრუტებიც:

N9 და N59 ავტობუსები ჭავჭავაძის გამზირიდან ავალიშვილის ქუჩით დაუკავშირდებიან ჭაბუა ამირეჯიბის გზატკეცილს, თამარაშვილის გამზირისა და გიორგი წერეთლის ქუჩის გავლით მოძრაობას გააგრძელებენ ბაგების მიმართულებით. ბაგებიდან მოძრაობისას N9 და N59 ავტობუსები ჭავჭავაძის გამზირიდან დაუკავშირდებიან მიშველაძის ქუჩას, რის შემდეგაც აბაშიძისა და თაქთაქიშვილის ქუჩების გავლით მოძრაობას ჭავჭავაძის გამზირზე განაგრძობენ.

N21, N51 და N61 მარშრუტები ჭავჭავაძის გამზირიდან მოუხვევენ კავსაძის ქუჩაზე, რის შემდეგაც გაივლიან ფალიაშვილის ქუჩას და გაჩერდებიან მიშველაძის ქუჩაზე (N21 მარშრუტი დროებით აღარ იმოძრავებს თსუ-ის მაღლივი კორპუსისკენ). უკუმიმართულებისას N21, N51 და N61 ავტობუსები მიშველაძის ქუჩიდან მოძრაობას გააგრძელებენ აბაშიძისა და თაქთაქიშვილის ქუჩების მიმართულებით, საიდანაც ილია ჭავჭავაძის გამზირს დაუკავშირდებიან.

N34 მარშრუტი სადგურის მოედნიდან ბაგებისკენ საბურთალოს გავლით იმოძრავებს. კერძოდ, გმირთა მოედნის შემდეგ გაივლის ჯერ კოსტავასა და მიროტაძის ქუჩებს, შემდეგ პეკინის, ვაჟა ფშაველასა და თამარაშვილის გამზირებს და წერეთლის ქუჩიდან ჭავჭავაძის გამზირს დაუკავშირდება. უკუმიმართულებისას, N34 ბაგებიდან გმირთა მოედნის მიმართულებით მოძრაობისას, გაივლის ჯერ თამარაშვილის, ყაზბეგისა და პეკინის გამზირებს, შემდეგ კი, კოსტავას ქუჩას.

N66 მარშრუტი ჭავჭავაძის გამზირიდან მოუხვევს მირცხულავას ქუჩაზე, გაივლის ფალიაშვილისა და არაყიშვილის ქუჩებს, საიდანაც აბაშიძის ქუჩას ასევე პეკინის გამზირისა და მელიქიშვილის ქუჩების გავლით.

N88 მარშრუტი ქავთარაძის ქუჩიდან ბარათაშვილის ქუჩისკენ იმოძრავებს ყაზბეგის გამზირის, პეკინის გამზირის, ვარაზისხევისა და მელიქიშვილის ქუჩის გავლით. უკუმიმართულებისას N88 რუსთაველის გამზირიდან მეტროსადგურ „დელისის“ მიმართულებით გაივლის კოსტავასა, მიროტაძის, პეკინისა დავაჟა-ფშაველას გამზირებს.

N140 მარშრუტი დამოკლდება და პოლიტკოვსკაიას ქუჩიდან ვაკის პარკამდე წრიულად იმოძრავებს.

ამასთან, ამოქმედდება ავტობუსის ახალი მარშრუტი. იგი მგზავრებს ბაგებიდან, წყნეთის გზატკეცილის მე-2 კორპუსიდან მეტროსადგურ „დელისამდე“ დიდი ტევადობის ავტობუსებით მოემსახურება.

ცვლილება შეეხება მიკროავტობუსების მარშუტებს: N4, N15, N32, N44, N73, N126, N128, N131, N137, N170, N171, N195 და N202.

N32, N126, N137, N170, N171 და N202 მიკროავტობუსები ჭავჭავაძის გამზირიდან ვაკის პარკის მიმართულებით ავალიშვილის ქუჩის, ამირეჯიბის გზატკეცილის, თამარაშვილის გამზირისა და წერეთლის ქუჩის გავლით იმოძრავებენ. უკუმიმართულებით მოძრაობისას ისინი ჭავჭავაძის გამზირიდან მოუხვევენ მიშველაძის ქუჩაზე, გაივლიან აბაშიძისა და თაქთაქიშვილის ქუჩებს და კვლავ ჭავჭავაძის გამზირს დაუკავშირდებიან.

N4, N131, N15, N73, N44 და N128 - ბარნოვის ქუჩიდან თამარაშვილის გამზირისკენ მოძრაობისას გაივლიან მრგვალ ბაღს, ერისთავის, ფალიაშვილისა და თაქთაქიშვილის ქუჩებს და შემდეგ, ჭავჭავაძის გამზირიდან მოუხვევენ ავალიშვილის ქუჩისა და ამირეჯიბის გზატკეცილის მიმართულებით. უკუმიმართულებისას აღნიშნული მიკროავტობუსების მარშრუტები არ იცვლება.

N195 მარშრუტი მოძრაობას ჭავჭავაძის გამზირისა და ყიფშიძის ქუჩის კუთხეში დაასრულებს.