შაბათს ბაღდადში ამერიკული ავიაციის მიერ განხორციელებული საჰაერო იერიშების შედეგად გარდაცვლილი პროირანული სამხედრო მაღალჩინოსნების დაკრძალვის ცერემონიალზე ათიათასობით ადამიანი შეიკრიბა. მოქალაქეები ამერიკისა და ისრაელის სიკვდილს სკანდირებდნენ და მოითხოვდნენ საპასუხო ღონისძიებების გატარებას ვაშინგტონის წინააღმდეგ. ინფორმაციას ამის შესახებ BUSINESSINSIDER-ი ავრცელებს. მიმდინარე ღონისძიების დროს აგრეთვე ირანის ერთ-ერთი ყველაზე გავლენიანი მაღალჩინოსნის, ალ-ქუდსის მეთაურის, ყასიმ სოლეიმანის პლაკატებს აფრიალებდნენ და გლოვობდნენ მის გარდაცვალებას.

სამგლოვირო პროცესია ბაღდადის მწვანე ზონაში დაიწყო- იქ სადაც დიპლომატიური მისიები, საელჩოები მდებარეობს, მათ შორის ამერიკის შეერთებული შტატების საგარეო საქმეთა სამინისტროს წარმომადგენელი უწყება.

სოციალურ ქსელ TWITTER-ში გავრცელდა აგრეთვე ვიდეო კადრები, სადაც ასახულია დაპირისპირების მომენტები ამერიკელ სამხედროებსა და ჰესბოლას ბოევიკებს, მხარდამჭერებს შორის. შელაპარაკება ფიზიკურ დაპირისპირებაში გადაიზარდა, რა დროსაც ამერიკელებმა აგრესიული დემონსტრანტების გაფანტვის მიზნით ჰაერში რამდენიმე გამაფრთხილებელი გასროლა განახორციელეს.

ოფიციალურ ირანს სოლეიმანის სხეულის ნაწილებს ხვალ გადასცემენ, რომელიც დაიკრძალება თავის მშობლიურ ქალაქ კერმანში. ირანის სახელმწიფო მედიის თქმით, სამგლოვიარო ცერემონიას გაუძღვება ქვეყნის სულიერი ლიდერი, აიათოლა ალი ჰამენეი.

შეგახსენებთ, აშშ-ს ავიაციის მიერ 2 დღის წინ ბაღდადის აეროპორტში განხორციელებულ ავიაიერიშებს 9 სამხედრო მაღალჩინოსანი ემსხვერპლა, მათ შორის ირანის რევოლუციის გუშაგთა კორპუსის ელიტური ქვედანაყოფის ხელმძღვანელი, ყასიმ სოლეიმანი.