შაბათს დილით ერაყში ირანულ სამხედრო ფორმირებებზე კიდევ ერთი საჰაერო შეტევა განხორციელდა.

გავრცელებული ინფორმაციით, პროირანულ გასამხედროებული ბოევიკების ავტოკოლონაზე თავდასხმა ისევ უპილოტო საფრენმა აპარატმა განახორციელა.

ამ დრომდე არ სახელდება იმ გარდაცვლილ პირთა ვინაობა, რომლებიც ავტომანქანებში იმყოფებოდნენ. ინფორმაციას ამის შესახებ FOX NEWS-ი ავრცელებს.

მედიაში გაჟღერდა აგრეთვე მოსაზრება იმის შესახებ, რომ განხორციელებული შეტევის შედეგად გარდაიცვალა ირანული სამხედრო დაჯგუფების მაღალჩინოსანი, შუბულ ალ-ზაიდი, რასაც ამ დრომდე არ ადასტურებენ ერაყული საინფორმაციო გამოცემები.

დაჯგუფების წევრების სამი მანქანიდან ორი დამწვარი ნახეს, სადაც 6 პირის დამწვარი გვამი იყო. დაშავებულია 3 პირი.

შეგახსენებთ, რომ აღნიშნული საჰაერო იერიში განხორციელდა 24 საათის შემდეგ, როდესაც ირანის რევოლუციის დამცველთა კორპუსის ელიტური სამხედრო ქვედანაყოფის, ალ-ქუდსის ლიდერი და ირანში ერთ-ერთი ყველაზე გავლენიანი სამხედრო მაღალჩინოსანი, ყასემ სულეიმანი მოკლეს უპილოტო საფრენი აპარატების რეიდების შედეგად.