ეროვნული ბიბლიოთეკის საგამოფენო დარბაზში დაგეგმილ წიგნის ფესტივალზე, ეროვნული ბიბლიოთეკის გამოცემის „გიორგი მაჩაბელი“ წარდგენა გაიმართა

საზოგადოება - 18:11, 29 Dec, 2019

1582

29 დეკემბერს, 17:00 საათზე, ეროვნული ბიბლიოთეკის საგამოფენო დარბაზში დაგეგმილ წიგნის ფესტივალზე, ეროვნული ბიბლიოთეკის გამოცემის „გიორგი მაჩაბელი“ წარდგენა გაიმართა.

წიგნში „გიორგი მაჩაბელი“ (თბილისი, 2019, 126 გვ.), რომლის ავტორები არიან ქართული ემიგრაციის ცნობილი მკვლევრები, პროფესორები რუსუდან დაუშვილი და ოთარ ჯანელიძე, გაშუქებულია საქართველოს თავისუფლებისათვის თვალსაჩინო მებრძოლის, პოლიტიკური მოღვაწის, ეროვნულ-დემოკრატიული პარტიის ერთერთი დამფუძნებლის, დიპლომატისა და მილიონერი ბიზნესმენის, მსოფლიოში ცნობილ პარფიუმერულ კომპანია „პრინცი მაჩაბლის“ (Prince Matchabelli) დამფუძნებლის გიორგი მაჩაბელის ცხოვრება და მოღვაწეობა.

გიორგი მაჩაბელი (1885 – 1935) იმ ქართველ პატრიოტთა წრეს ეკუთვნის, რომელთა სახელებთანაც მჭიდროდაა დაკავშირებული საქართველოს სახელმწიფოებრივი დამოუკიდებლობის აღდგენა 1918 წლის 26 მაისს.
ოთარ ჯანელიძე

ნაშრომი გიორგი მაჩაბლის დაბადებიდან 130-ე და გარდაცვალებიდან მე-80 წლისთავს ეძღვნება და ორენოვანია - დაბეჭდილია ქართულ და ინგლისურ ენებზე. უნიკალური ფოტომასალით ილუსტრირებული ეს მონოგრაფია მოგვითხრობს და ეპოქის ფონზე გვაცნობს გიორგი მაჩაბლის შინაარსიან ცხოვრების გზას, რომელიც საქართველოში დაიწყო და ამერიკის შეერთებულ შტატებში შეწყდა.

გამოცემა უცხოენოვან მკითხველს და მთლიანად განათლებულ კაცობრიობას კიდევ ერთხელ შეახსენებს, რომ გიორგი მაჩაბელი შიდა ქართლის (სამაჩაბლოს) იმ ძირძველი კუთხის შვილია, რომელიც დღეს დედასამშობლოსგან მავთულხლართებითაა გამიჯნული და საქართველოს იურისდიქციას აღარ ექვემდებარება. გიორგი მაჩაბლის ისტორიულ სამკვიდროში ახლა, სამწუხაროდ, კულტურული მემკვიდრეობა სრულიად დაუცველია, მას უნუგეშოდ ხელყოფენ და ცდილობენ აღმოფხვრან ქართული კვალი.

წიგნი საქართველოს პარლამენტის ილია ჭავჭავაძის სახელობის ეროვნული ბიბლიოთეკის ფინანსური მხარდაჭერით მომზადდა და გამოიცა.

ნაშრომის რედაქტორია პროფესორი გიორგი სოსიაშვილი.

ქართულ ემიგრანტულ ჟურნალ „სამშობლოს“ (პარიზი, 1935, N17-18) შეფასებით: „განთავისუფლებული საქართველო და მომავალი თაობანიც იამაყებენ იმ თავგადასავლით, რომლითაც ძვირფასმა გიორგიმ დაამშვენა

ერთ-ერთი ულამაზესი, უსაშიშროესი და უღრმესი განცდებით სავსე ფურცელი ჩვენი ახალი ისტორიისა“