მოსკოვში დააკავეს ორგანიზებული კრიმინალური ბანდის 3 წევრი, რომლებიც თავს ესხმოდნენ და ხოცავდნენ დედაქალაქელ ბიზნესნემებს. ამის შესახებ ინფორმაციას ავრცელებს რუსული მედია, რომელთა ინფორმაციითაც დგინდება, რომ აღნიშნულ დანაშაულში მონაწილეები არიან რუსეთის ფედერალური უსაფრთხოების სამსახურის ყოფილი მებრძოლები.

სპეცრაზმის ვეტერანები დააკავეს მოსკოვისა და ვლადიმირის რეგიონებში უსაფრთხოების ძალების ერთობლივი ოპერაციის დროს.

მედიის მიერ მოპოვებული ინფორმაციის საფუძველზე დგინდება, რომ 10 წლის წინ ერთ-ერთმა ბრალდებულმა უკანონო გამდიდრების მიზნით შექმნა კრიმინალური ბანდა და მიიმხრო თავისი კოლეგებიც.

პირველი თავდასხმა მათ განახორციელეს 2008 წელს დონსკის ქუჩაზე- ბიზნესმენის ავტომობილი დაცხრილეს, რომელშიც დიდი რაოდენობით ფული ინახებოდა. სროლის შედეგად ბიზნესმენი და მისი მძღოლი დაიღუპნენ. 2012 წელს ისინი აგრეთვე დედაქალაქის ერთ-ერთ მდიდარ მაცხოვრებელს დაესხნენ თავს, რომელიც მიყენებული სხეულის მძიმე დაზიანებების შედეგად ადგილზე გარდაიცვალა.

ბანდის წევრების საცხოვრებლებში ჩატარებული ჩხრეკის შედეგად სამართალმდაცავებმა დიდი რაოდენობით ცეცხლსასროლი იარაღი და ასაფეთქებელი ნივთიერებები ამოიღეს.