ბრიტანულმა სუპერმარკეტების ქსელმა, ტესკომ შეაჩერა საშობაო ბარათების გაყიდვა მას შემდეგ, რაც 6 წლის ინგლისელმა გოგონამ მისალოც ბარათში უცნაური წერილი აღმოაჩინა, სადაც პატიმრები წარმომავლობის დახმარებას ითხოვენ. ინფორმაციას ავრცელებს GUARDIAN-ი.

კომპანიის მიერ გაცხადებულ ინფორმაციაში ნათქვამია, რომ მათმა ჩინეთში არსებულმა ქარხანამ ფუნქციონირება შეაჩერა მას შემდეგ, რაც ნათელი გახდა, რომ საპატიმროებში მყოფ მსჯავრდებულებს იძულებით ამუშავებენ სხვადასხვა პროდუქციების დამზადებასა და შეფუთვებზე.

მედიაში ინფორმაცია მას შემდეგ გავრცელდა, რაც 6 წლის გოგონამ, ფლორენს ვიდიკომბმა სამხრეთ ლონდონში, სუპერმარკეტში შეძენილი საქველმოქმედო საშობაო ბარათი გახსნა, აღმოაჩინა სრულიადნ უცნობი ადამიანის მიმართვა დახმარების შესახებ.

„ჩვენ უცხოელი პატიმრები ვართ შანხაის ქინგპუს ციხიდან, რომლებსაც გვაიძულებენ მუშაობას ჩვენი ნების საწინააღმდეგოდ. გთხოვთ დაგვეხმაროთ და შეატყობინოთ ამის შესახებ ადამიანის უფლებათა დამცველ ორგანიზაციებს“ ,- წერს ერთ-ერთი პატიმარი.

მან აგრეთვე მოითხოვა, რომ ეს შეტყობინება გადაეცათ ჟურნალისტი პიტერ ჰამფრისთვის, რომელმაც 23 თვე გაატარა ქინგპუს ციხეში. ფლორენსის მამა, ბენ ვიდიკომბი დაუკავშირდა ჰემფრის, რომელმაც ზემოხსენებულის შესახებ შემდგომ SUNDAY TIMES-ს მიაწოდა ინფორმაცია.

ჟურნალისტის განცხადებით, იგი დაუკავშირდა ყოფილ პატიმრებს, რომელთაგან ერთ-ერთმა თქვა, რომ ორი წლის განმავლობაში ტესკოს სხვადასხვა სახის, მათ შორის მისალოც ბარათებს ამზადებდა. მისი თქმით, მათ აგრეთვე აიძულებდნენ ტესკოს სასაჩუქრე ბარათების შეფუთვასაც.

მომხდარ ფაქტს გამოეხმაურა აგრეთვე სუპერმარკეტების ქსელის სპიკერი, რომელმაც განაცხადა, რომ ისინი ემიჯნებიან და გმობენ პატიმრების გამოყენებას მუშახელად და არასდროს დაუშვებენ მსგავს ამორალურ ქმედებას. „ ჩვენ შოკირებული ვართ აღნიშნული ბრალდებით, რის გამოც დაუყოვნებლივ შევაჩერეთ იმ ქარხნის ფუნქციონირება, სადაც მზადდებოდა ბარათები“. მათი თქმით, დაწყებულია და ამ დრომდე მიმდინარეობს გამოძიება.