„ევექსი ჰოსპიტლების“ სარეზიდენტო პროგრამის პირველი ნაკადი დამოუკიდებელ საექიმო საქმიანობის შესრულებას შეუდგა. გამოსაშვებ საზეიმო ღონისძიებაზე 47 სტუდენტიდან ორი ყველაზე წარმატებული რეზიდენტი გამოვლინდა. ევექსი ჰოსპიტლებმა გიორგი აბაშიშვილს და ლაშა აფრიამაშვილს 6 თვიანი საექიმო პრაქტიკა ისრაელის წამყვან სამედიცინო ცენტრებში დაუფინანსა. 2019 წლის ევექსი ჰოსპიტლების სარეზიდენტო პროგრამის ფარგლებში სწავლა 47 რეზიდენტმა დაასრულა, მათგან 30 უკვე ქსელის მასშტაბით არსებულ ჰოსპიტლებში დასაქმდა.

2015 წლიდან ევექსი ჰოსპიტლები დიპლომის შემდგომი მზადების პროცესში ჩაერთო და დღეს ის აკრედიტირებულ 29 სარეზიდენტო პროგრამას მართავს. 4 წლის განმავლობაში ევექსი ჰოსპიტლების სარეზიდენტო პროგრამებში 315 რეზიდენტია ჩართული. სწავლის პროცესი თბილისში, სამეგრელოში, აჭარაში, კახეთსა და იმერეთში მიმდინარეობს. სარეზიდენტო პროგრამის ხელმძღვანელები როგორც ადგილობრივი, ასევე ევროპისა და ამერიკის წამყვანი სამედიცინო ცენტრების პროფესორები არიან. პროგრამაში მიღება ყოველწლიურად ცხადდება და მოქმედებს მოქნილი საგრანტო სისტემა, რომლის მიხედვითაც მისაღები კონკურსის შედეგების საფუძველზე რეზიდენტები 100%-იანი გრანტით ფინანსდებიან.

ევექსი ჰოსპიტლები მომავალშიც განაგრძობს წარმატებული რეზიდენტის საექიმო პრაქტიკის დაფინანსებას გერმანიაში, ისრაელში ან ნიდერლანდებში. შედეგად, 3-5 წელიწადში ქვეყანას უცხოეთის წამყვან სამედიცინო ცენტრებში მიღებული გამოცდილების 60-ზე მეტი ექიმი ეყოლება.