ლუკაშენკომ საქართველო დსთ-ს შემადგენლობაში დასაბრუნებლად მიიწვია

მსოფლიო - 11:28, 26 Oct, 2013

1033

ბელორუსიის პრეზიდენტმა ალექსანდრე ლუკაშენკომ საქართველო დამოუკიდებელ სახელმწიფოთა თანამეგობრობაში დასაბრუნებლად მიიწვია.

„ჩვენ ვისურვებდით, რომ საქართველო დსთ-ს შემადგენლობაი დაბრუნდეს“, - განაცხადა ლუკაშენკომ დსთ-ს სახელმწიფოთა საბჭოს შეკრების შედეგებთან დაკავშირებით გამართულ პრეს-კონფერენციაზე. ბელორუსიის პრეზიდენტის აზრით, საქართველოს ჰქონდა გარკვეული მიზეზები თანამეგობრობის დასატოვებლად.

„საქართველოში ძალიან ბევრს, მათ შორის ხელისუფლებაში, სურს, რომ ჰქონდეს მოედანი, სადაც შეიძლება განვიხილოთ არამარტო პოლიტიკური, არამედ ეკონომიკური საკითხებიც, ჩვენი სახელმწიფოების სასიცოცხლო საკითხები“, - თქვა ლუკაშენკომ. მან იმედი გამოთქვა, რომ „საქართველო გაიგებს ამ გზავნილს“.

ლუკაშენკოს თქმით, იმისათვის, რომ სიტყვიდან საქმეზე გადავიდეთ, უნდა ვეძებოთ არა ის, რაც ყოფს ქვეყნებს, არამედ ის, რაც მათ აერთიანებს. ამ წლის დასაწყისში, ლუკაშენკომ უკვე შეთავაზა საქართველოს დსთ-ში თუნდაც დამკვირვებლის სტატუსით დაბრუნება.

საქართველოს დსთ-ს შემადგენლობიდან გამოსვლის შესახებ პრეზიდენტმა მიხეილ სააკაშვილმა 2008 წელს სამხრეთ ოსეთში შეიარაღებული კონფლიქტის შემდეგ გამოაცხადა.