დიდუბე-ჩუღურეთის პოლიციის სამმართველოს გამომძიებლის, მარიანა ჩოლოიანის ადვოკატის თეონა გვაზავას თქმით, მისი დაცვის ქვეშ მყოფი ბრალს არ აღეარებს.

„ბრალი ჯერ ოფიციალურად წარდგენილი არ არის, თუმცა მუხლი, რომლითაც დაკავებულია ჩვენების იძულება, ამ ფაქტობრივ გარემოებას არ ვეთანხმებით. ბრალდებული არ აღიარებს ამ ბრალდებას, იმ მუხლს, რომლითაც სისხლის სამართლებრივი დევნაა დაწყებული. დღის ბოლომდე საქმის მასალები გადმოგვეცემა და უფრო დეტალურად შემდეგ მოგახსენებთ. რამე სახის კანონის დარღვევას, რამე სახის იძულებას ან კანონით გაუთვალისწინებელ ქმედებას არც ერთი პოლიციელის, მათ შორის ბრალდებულის მხრიდან ადგილი არ ჰქონია" - აღნიშნა ადვოკატმა.

15 წლის ლუკა სირაძე "მწვანე სკოლის" მოსწავლე იყო. ოჯახის ინფორმაციით, მოზარდს ტერორითა და დაშინებით სკოლის შიდა და გარე ტერიტორიაზე სხვადასხვა წარწერის აღიარებას აიძულებდნენ. გარდაცვლილის ძმა ამბობს, რომ დაკითხვის დროს ლუკამ ფსიქოლოგიური ზეწოლა განიცადა, შეუძლოდაც გახდა, თუმცა მოძალადე პოლიციელებმა სასწრაფო დახმარების გამოძახებაზე ატირებულ ბიჭს უარი განუცხადეს.

ლუკა გუშინ, იაშვილის სახელობის ბავშვთა კლინიკაში გონსმოუსვლელად გარდაიცვალა და სწორედ ამის შემდეგ დააკავეს საქმის ერთ-ერთი გამომძიებელი მარიანა ჩოლოიანი.

ხაზგასასმელია, რომ თავდაპირველად, შსს უარყოფდა ზეწოლის ფაქტს, მინსიტრის მოადგილე ნინო ცაციაშვილი აცხადებდა, რომ საზოგადოებაში მხოლოდ ცრუ ინფორმაციები ვრცელდებოდა და რომ მოზარდის მიმართ იძულებით ჩვენების მიცემას ადგილი არ ჰქონია. თუმცა გუშინ, მოზარდის გარდაცვალების შემდეგ დიდუბე-ჩუღურეთის პოლიციის განყოფილების გამომძიებელს ბრალად სს კოდექსის 335-ე მუხლი წაუყენეს, რაც ჩვენების მიჩემის იძულებას გულისხმობს.

მოზარდის გარდაცვალების შემდეგ საპროტესტო აქციები როგორც თბილისში, ასევე რეგიონებში პერმანენტულად იმართება. პროტესტის ფონზე შს მინისტრის გადადგომასაც ითხოვენ. ახალგაზრდები ხელისუფლებას ვადას აძლევენ და აფრთხილებენ, რომ თუკი არ მოხდება ყველა თანამდებობის პირის დასჯა, ისინი სათანადო პასუხს გასცემენ ხელისუფლებას.