თურქეთის პრეზიდენტი, რეჯეპ ტაიპ ერდოღანი აშშ-ს დაემუქრა, რომ დახურავს სამხედრო ბაზებს, თუ ვაშინგტონი დაუწესებს ანკარას ეკონომიკურ სანქციებს რუსულ ანტისაჰაერო სისტემების შესყიდვასთან დაკავშირებით. ინფორმაციას ავრცელებს DEUTSCHE WELLE.

„თუ საჭირო გახდება, ჩვენ დავხურავთ ინჯირლიკისა და ქურეჯიქის ამერიკულ სამხედრო ბაზებს. თუ საფრთხე სანქციების დაწესებასთან დაკავშირებით რეალურად დადგება, ჩვენ განვილიხავთ საპასუხო ზომად ბაზების დახურვის საკითხს“ ,- განაცხადა ერდოღანმა მედიისთვის მიცემულ ინტერვიუში.

ინჯირლიკის საჰაერო ბაზა, რომელიც მდებარეობს თურქეთის სამხრეთით, უმნიშვნელოვანეს როლს ასრულებს ამერიკისთვის ახლო აღმოსავლეთსა და ავღანეთში სამხედრო ოპერაციების წარმართვაში. სწორედ ამავე ბაზიდან ხორციელდებოდა წლების განმავლობაში საჰაერო იერიშები ერაყსა და სირიაში . აღნიშნულ სამხედრო ობიექტზე განლაგებულია აგრეთვე B-61 -ის ტიპის ბირთვული საავიაციო ბომბები.

ქურეჯიქში კი განლაგებულია ნატოს სარადარო ბაზა, რომელიც ალიანსის ერთიანი ჰაერსაწინააღმდეგო სისტემის მნიშვნელოვანი შემადგენელი კომპონენტია, რომლის მთავარ დანიშნულებას წარმოადგენს სარაკეტო თავდასხმამდე შტაბისთვის ინფორმაციების ოპერატიული მიწოდება, თვალყურის დევნება რაკეტებისა და საფრენი აპარატების გადაადგილების შესახებ.