მალტაში სამოქალაქო აქტივისტები შეიჭრნენ პრემიერ-მინისტრ ჯოზეფ მუსკატის ოფისში და შესასვლელის ბლოკირება მოახდინეს. დემონსტრანტები ითხოვენ პრემიერის გადადგომას 2017 წელს ჟურნალისტი დაფნე კარუანა გალიციას მკვლელობის საქმეზე. ინფორმაციას REUTERS-ი ავრცელებს.

გამოძიებამ დაადგინა, რომ მუსკატის უშუალო მონაწილეობა არ იკვეთება ზემოხსენებულ მკვლელობაში, თუმცა ერთ-ერთი მოწმის აღიარებითი ჩვენების შედეგად დადგინდა, რომ მთავრობის ხელმძღვანელთან დაახლოებული პირები ცდილობდნენ დანაშაულის მიჩქმალვას, რომელთაც მუსკატისგან ჰქონდათ მხარდაჭერა.

40-მდე აქტივისტმა გადაკეტა პრემიერის ოფისის შესასვლელი, რომლებიც „შეიარაღებულნი“ იყვნენ დოლებით, სასტვენებით, დროშებითა და ხმის გამაძლიერებლებით.

პრემიერმა განაცხადა, რომ პოსტს ახალი წლის შემდეგ დატოვებს. მისი ოპონენტები კი აცხადებენ, რომ პრემიერს უფლებამოსილება დაუყოვნებლივ უნდა შეუწყდეს.

შეგახსენებთ, რომ გალიცია 2017 წელს მანქანაში ჩამონტაჟებული ბომბის აფეთქების შედეგად გარდაიცვალა მას შემდეგ, რაც მან ამხილა მალტელი ბიზნესმენები და პოლიტიკური ელიტა კორუფციულ საქმიანობებზე.