აშშ-ს სადაზვერვო სამსახურების მიერ ჩატარებული გამოძიების შედეგად დადგინდა, რომ ირანიდან ერაყში ხდება მოკლე მანძილზე მოქმედი ბალისტიკური რაკეტების გადატანა. ამის შესახებ წერს NEW YORK TIMES-ი.

პენტაგონის მაღალჩინოსანთა განცხადებით, ირანი სარგებლობს ერაყში არსებული ქაოსით და შეაქვს აღნიშნულ ტერიტორიაზე ბალისტიკური რაკეტები, რათა ახლო აღმოსავლეთის რეგიონზე და აშშ-ს მოკავშირეების შანტაჟს საშუალება მუდმივად ჰქონდეს.

„რაკეტები საფრთხეს უქმნიან რეგიონში ამერიკელ მოკავშირეებსა და პარტნიორებს, მათ შორის ისრაელს, საუდის არაბეთს და შესაძლოა საფრთხე შეუქმნან ამერიკულ ჯარებსაც კი ", - აცხადებენ დაზვერვის წარმომადგენლები

New York times-ის სტატიაში გაცხადებულია , რომ თუ შეერთებული შტატები ან ისრაელი დაბომბავენ ირანს, მის სამხედროებს შეეძლებათ ერაყში დამალული რაკეტების გამოყენება ისრაელის ან სპარსეთის ყურის სახელმწიფოების შესაჩერებლად. ამ იარაღის უბრალო არსებობამ ასევე შეიძლება ხელი შეუწყოს თავდასხმების თავიდან აცილებას.

დაზვერვის ოფიციალური პირები არ აკონკრეტებენ ბალისტიკური რაკეტების ზუსტ მოდელებს, თუმცა გავრცელდა ინფორმაცია, რომ აღნიშნული იარაღის მოქმედების მანძილი დაახლოებით 600 მილია, რაც ნიშნავს იმას, რომ თეირანს შეეძლება ბაღდადის გარეუბნიდან გასროლილი რაკეტებით დაბომბოს იერუსალიმი.