აშშ-ში საზღვაო ბაზა პერლ-ჰარბორზე სროლის შედეგად ორი ადამიანი დაიღუპა ერთ კი მძიმედ დაშავდა. გავრცელებული ინფორმაციით, მეზღვაურმა აღნიშნული შემთხვევის შემდეგ თავი მოიკლა. ინფორმაციას BBC ავრცელებს.

ჰავაის ბაზის ხელმძღვანელმა რობერთ ჩედვიკმა განაცხადა, რომ სროლა მოხდა ლოს-ანჟელესის კლასის წყალქვეშა ნავთან, რომელიც დოკში იმყოფებოდა, სადაც სარემონტო სამუშაოები მიმდინარეობდა. მკვლელი მეზღვაური სწორედ ზემოხსენებული ხომალდის ეკიპაჟის წევრი იყო.

სროლის შედეგად დაიხურა სამხედრო ბაზა, რომელიც აშშ-ს საზღვაო და საჰაერო ძალების განთავსებული ერთ-ერთი ყველაზე მნიშვნელოვანი ლოკაციაა.

უბედური შემთხვევა ბაზაზე მოხდა პერლ-ჰარბორის დაბომბვის 78-ე წლისთავამდე 2 დღით ადრე - 1941 წლის 7 დეკემბერს ჰავაიზე განლაგებულ ამერიკულ სამხედრო ფლოტს თავს დაესხა იაპონური ავიაცია, რომელმაც გამოიწვია აშშ-ს ჩართვა მეორე მსოფლიო ომში. შეტევის შედეგად გარდაიცვალა 2300 ამერიკელი სამხედრო და განადგურდა რამდენიმე საბრძოლო ხომალდი.