საზეიმო შოუს დროს ჯოკერის მიერ "დაცხრილული" 6 წლის ბავშვები

საზეიმო შოუს დროს ჯოკერის მიერ "დაცხრილული" 6 წლის ბავშვები - შემთხვევა დაბადების დღის ცენტრში

საზოგადოება - 13:50, 04 Dec, 2019

1638

თბილისში, ერთერთ დაბადების დღის ცენტრში, 4-6 წლის ბავშვებს, აგრესიის ელემენტების შემცველი შოუ უჩვენეს. როგორც 6 წლის გოგონას მშობელი წერს, ზეიმის ბოლოს გამოჩნდა პერსონაჟი ჯოკერი, რომელმაც სათამაშო ავტომატი ამოიღო და ბავშვები "დაცხრილა", მერე კი სათამაშო ავტომატი იუბილარს გადასცა და ურჩია, თანატოლებიდან ის "ჩაეცხრილა", ვინც თვითონ უნდოდა.

6 წლის ბავშვის დედა წერს:
ჩემი 5 წლის შვილი, ნინა, მყავდა კლასელის დაბადებია დღეზე Dejavu Birthday Club-ში. დაბადების დღის ბოლოს ბავშვებს უთხრეს, დაუძახეთ ჯოკერსო (6 წლის ბავშვის დაბადების დღეა). ნინამ ეგრევე მითხრა, ჯოკერი მოდის და მეშინია, ჩემთან იყავიო. კიდევ კარგი, უკვე მისული ვიყავი, არც მინდა იმის წარმოდგენა, იქ რომ არ ვყოფილიყავი!
სცენაზე გამოვიდა ჯოკერი, დაჯდა სკამზე, შუქები აქვს დანათებული, თავი აქვს ჩახრილი, ისმის დაძაბული მუსიკა და ჯოკერის საშინელი სიცილი. ნინას სახე აელეწა და ეგრევე გამოვიყვანე. პალტო რომ ჩავაცვი და გასასვლელისკენ გამყავდა, გავხედეთ სცენას და რას ვხედავთ: ჯოკერმა აიღო ავტომატი, მიუშვირა ბავშვებს და "ჩაცხრილა"! ნინა გამოვაქანე ცენტრიდან, მაგრამ ძალიან დიდხანს ვამშვიდებდი. რატომ გავიხედეო, ჩემს მეგობრებს თოფი ესროლაო!
ეს თავის მეგობრებზე ნერვიულობდა და ვინც იქ იჯდა, 4, 5, 6 წლის ბავშვების მდგომარეობის წარმოდგენაც არ მინდა, ჯოკერი რომ ავტომატს მოგიშვერს და გგონია, რომ გესვრის! ნინა მეუბნებოდა, იქ ერთი ბავშვი 4 წლის იყოო. გეხვეწები, ყველა ჩემი კლასელის მშობელს დაურეკე, იქ არავის გადაუხადონ დაბადების დღეო! ვერ ვაჯერებდი, რომ მსახიობი იყო ჯოკერი. გაოგნებული ვარ! აზროვნების უნარი არ აქვს ან ცენტრს ან მშობელს? არ ვიცი, რა ვთქვა! ამ ქვეყანაში მართლა ყველაფერი რეგულირებული უნდა იყოს! და დიახ, მშობლები არ უნდა წყვეტდნენ, მათი 5 წლის შვილი მზად არის თუ არა სკოლისთვის, რადგან იმასაც ვერ ხვდებიან, რომ 5-6 წლის ბავშვის დაბადების დღეზე ჯოკერი არ უნდა მოიყვანონ, რომელიც ბავშვებს ავტომატით აშინებს! მერე თურმე ისე გაგრძელდა დაბადების დღე, რომ ჯოკერმა იუბილარს მისცა ავტომატი და იმას ჰქონდა საშუალება, თავისი მეგობრებისთვის ესროლა. არ ვიცი, რა ვთქვა.
ერთი ვიცი, რომ მომავალში წინასწარ ზედმიწევით გავარკვევ დაბადების დღის პროგრამას და მარტოს ალბათ დიდხანს აღარ დავტოვებ (თქვენც იგივეს გირჩევთ). ჩემს შვილს პირადად მიადგა ფსიქიკური ტრავმა, რომლის გამოც თამამად შემიძლია სასამართლოში ჩივილი! არ ვიცი, ამ პოსტს რა შედეგი შეიძლება მოჰყვეს, მაგრამ იმედი მაქვს, ამ ცენტრის ადმინისტაცია დაფიქრდება, რომ ბავშვებს რომ უწყობ დაბადების დღეებს, მეტი პასუხისმგებლობა გეკისრება და რაც არ უნდა მშობლების სურვილით გაამართლო შენი საქციელი, უნდა იცოდე, რომელი ასაკობრივი ჯგუფისთვის რა პროგრამაა შესაფერისი! მადლობა ყურადღებისთვის“, - წერს ნათია ბუკია.
მის პოსტს მალევე მოჰყვა იმ მშობლის სტატუსიც, ვინც სწორედ ეს ცენტრი შეარჩია მასპინძლად იუბილარი შვილისთვის. მან განაცხადა, რომ ჯოკრის, როგორც პერსონაჟის შემოყვანა თავად ითხოვა ცენტრისგან, მაგრამ აგრესიის ელემენტები არ უნდა ყოფილიყო. ამასთან, იუბილარის მშობელმა დაწერა, რომ როგორც კი სიტუაცია არ მოეწონა, მაშინვე მოითხოვა შოუს შეწყვეტა, მაგრამ ეს, მისივე თქმით, "რთული აღმოჩნდა".
სოციალურ ქსელებში ატეხილი ხმაურის შემდეგ ამ ფაქტს თვითონ დაბადების დღის ცენტრის ადმინისტრაციაც გამოეხმაურა.
"მოგესალმებით. წლების მანძილზე ჩვენი კომპანიის ერთადერთი მიზანია, ბავშვებს ავუხდინოთ სურვილები და ვაჩუქოთ ბედნიერი წუთები. ნებისმიერი ჩვენი გადაწყვეტილება ნაკარნახევია მხოლოდ ბავშვების ინტერესებიდან გამომდინარე. ეს ახალი პერსონაჟი ჩვენ შევქმენით მასზე არსებული ძალიან დიდი მოთხოვნის საფუძველზე და მოიაზრება ჩვენი საახალწლო-საკარნავალო პროგრამების დამატებით შოუდ მოზრდილებისთვის.
ჩვენი „ჯოკერი“ ვიზუალური თვალსაზრისით მაქსიმალურად მიახლოებულია ორიგინალთან და აქვს შესაბიმისი სათამაშო რეკვიზიტები, რამაც პერსონაჟს ზედმეტად რეალისტური სახე მისცა.გულწრფელად ვწუხვართ და გვსურს მოვუბოდიშოთ იუბილარის მშობლებს, ბავშვებს და სხვა სტუმრებს, ვინც თავი არაკომფორტულად იგრძნო შოუს გამო.
მიუხედავად პერსონაჟის ნეგატიური ხასიათისა, მის მიღმა ნიჭიერი და თბილი ადამიანი იმალება", - ნათქვამი იყო განცხადებაში.