ჩინურ ქალაქ, ჩონგჩინგში მსოფლიოში ყველაზე მეტი, 2,6 მილიონი სათვალთვალო ვიდეო კამერაა დამონტაჟებული საჯარო სივრცეში, რომელსაც სამართალდამცავი უწყებები იყენებენ ადამიანთა სახეების სკანირებისთვის და ინახავენ გამოსახულებებს მონაცემთა ბაზაში დანაშაულის პრევენციისთვის. აღნიშნულ ინფორმაციას GUARDIAN-ი ავრცელებს.

სტატიაში ხაზგასმულია, რომ ჩონგჩინგის პოლიციის ოფიცერს ზაფხულში მიუვიდა შეტყობინება, რომ ქალაქში არსებული ვიდეო კამერების ერთობლივმა მონაცემთა ბაზამ ამოიცნო 2002 წლის მკვლელობის საქმეში ბრალდებული ეჭვმიტანილი, რომელიც შემდგომში დააპატიმრეს.

ქალაქის სათვალთვალო სისტემა ახდენს იმ ადამიანების სახის სკანირებას, რომლებიც გადაადგილდებიან ქუჩებში. თითოეული ადამიანის სახე ინახება მონაცემთა ბაზაში, შემდეგ კი იქმნება ე.წ ვირტუალური რუკა, სადაც აღნიშნული პიროვნებები გადაადგილდებიან და დაფიქსირებულნი არიან კამერების მიერ.

ერთიანი სათვალთვალო სისტემის დახმარებით, სამართალდამცავებმა შეძლეს 3 დღის შემდეგ 15 მილიონიან ქალაქში დაეკავებინათ მიმალვაში მყოფი ეჭვმიტანილი , რომელმაც საბოლოოდ ჩადენილი დანაშაული აღიარა.

სტატიაში აღნიშნულია, რომ 15.35 მილიონიან ქალაქში 2.58 მილიონი კამერაა დამონტაჟებული, რომლის საფუძველზეც დგინდება, რომ ყოველ 6 მოქალაქეზე 1 სათვალთვალო კამერა მოდის- ამ მონაცემებით კი ჩონგჩინგი მსოფლიოში ყველაზე მეტი სათვალთვალო კამერით აღჭურვილი ქალაქია.

ადამიანის უფლებათა დამცველი არასამთავრობო ორგანიზაციები გმობენ მთავრობის გადაწყვეტილებას, უთვალთვალონ თითოეული მოქალაქის გადაადგილების მარშრუტს, რითაც მათი აზრით, ირღვევა თითოეული პიროვნების პირადი სივრცე, რადგან ისინი კონტროლდებიან სამართალდამცავთა მიერ და სხვებს გააჩნიათ ინფორმაცია იმის შესახებ, თუ სად მოძრაობს ესა თუ ის ადამიანი დროის სხვადასხვა მონაკვეთში.