ავიამიმოსვლა რუსეთსა და საქართველოს შორის 2020 წლის პირველ ნახევარში აღდგება,-ამის შესახებ ინფორმაციას გამოცემა Известия-ს აწვდის მთავრობის მაღალჩინოსნები. მათი თქმით, რეისების აღდგენა ახალ წლამდე შეუძლებელია იმ კრიზისის გამო, რის ფონზეც მიმდინარეობს თბილისში მასობრივი მიტინგები.

Известия-ს საქართველოს პრემიერ-მინისტრის, გიორგი გახარიას წარმომადგენელმა რუსეთთან ურთიერთობების საკითხებში, ზურაბ აბაშიძემ განაცხადა, რომ თბილისი ერთმნიშვნელოვნად მიესალმება რუსეთსა და საქართველოს შორის ავიამიმოსვლების აღდგენას.

შეგახსენებთ, რომ 21 ივნისს ვლადიმირ პუტინმა გამოსცა ბრძანება, რომლის თანახმადაც 8 ივლისიდან რუსულ ავიაკომპანიებს საქართველოში ფრენები აეკრძალათ. რუსეთის პრეზიდენტმა ეს გადაწყვეტილება მას შემდეგ მიიღო, რაც საქართველოში ანტისაოკუპაციო აქციები გაიმართა და საზოგადოებამ რუსეთის დუმის დეპუტატის, გავრილოვის მიერ პარლამენტის თავმჯდომარის სავარძლის დაკავება გააპროტესტა.