აზერბაიჯანის პრეზიდენტმა, ილჰამ ალიევმა დაადანაშაულა საერთაშორისო ორგანიზაციები ორმაგი სტანდარტების გამოყენებაში ადამიანის უფლებების დაცვის შეფასების კუთხით. ამის შესახებ INTERFAX-ი ავრცელებს ინფორმაციას.

ხუთშაბათს, ალიევმა ბულგარეთის შინაგან საქმეთა მინისტრთან, მოლდენ მარინოვთან უსაფრთხოების საკითხებზე შეხვედრის ფარგლებში განაცხადა, რომ საერთაშორისო ორგანიზაციები, რომლებიც ადამიანის უფლებებს იცავენ არც ერთ შემთხვევაში არ რეაგირებენ, როდესაც სხვა სახელმწიფოს მთავრობები მშვიდობიანი მომიტინგეების მიმართ ძალადობენ.

„ჩვენ ყოველდღიურად ვუყურებთ სხვადასხვა ქვეყნებში, თუ რაოდენ სასტიკად ეპყრობიან დემონსტრანტებს-სცემენ, კლავენ, მათ წინააღმდეგ იყენებენ ცრემლსადენ გაზს, წყლის ჭავლსა და ხელჯოხებს“,- აცხადებს ალიევი.

აზერბაიჯანის პრეზიდენტის თქმით, მას აინტერესებს, თუ რატომ არიან ჩუმად საერთაშორისო ორგანიზაციები ზემოხსენებული შემთხვევების დროს, რადგან მათი ვალდებულება ადამიანების დაცვა უნდა იყოს, როდესაც მომიტინგეებს სასტიკად უსწორდებიან და არაადამიანურად შლიან აქციებს.

„აზერბაიჯანთან მიმართებაში, როდესაც რამე მცირედი ეპიზოდი ხდება, გარკვეული ქვეყნების ელჩები იწყებენ იმაზე საუბარს, რომ ამაში დამნაშავე ჩვენი მთავრობაა“,-განაცხადა ალიევმა. პრეზიდენტის განცხადებით, ეს ორმაგი სტანდარტის გამოვლინებაა და ძირს უთხრის ადამიანის უფლებათა დაცვის საერთაშორისო ორგანიზაციების მიმართ სანდოობას.

„ვინმე რომ დაადანაშაულონ რაიმე საკითხში, მათ პირველ რიგში უნდა ჰქონდეს ამის მორალური უფლება. ჩვენ ბრალს გვდებენ ისინი, რომლებიც თვითონ არღვევენ ადამიანის უფლებებს და სისასტიკეს ავლენენ დემონსტრაციების დარბევისას“ ,- თქვა ალიევმა.