ჰონგ-კონგის პოლიციამ შტურმით აიღო პოლიტექნიკური უნივერსიტეტის კამპუსი, რომელიც რამდენიმე ასეულ მომიტინგე სტუდენტს ჰქონდა გამაგრებული. დაპირისპირების დროს სამართალდამცავების მიმართულებით დემონსტრანტებმა გამოიყენეს ალმოდებული კასრები და არბალეტის საშუალებით გაისროლეს ისრები, თუმცა პოლიციელთა მასობრივი შეტევის შედეგად ცრემლსადენი გაზისა და რეზინის ტყვიების საშულაებით მომიტინგეებმა უკან დაიხიეს, რა დროსაც მრავალი მათგანი დააკავეს. ინფორმაციას BBC ავრცელებს.

დაპირისპირება 24 საათის განმავლობაში გაგრძელდა. დემონსტრანტებმა სცადეს ალყის გარღვევა, თუმცა პოლიციამ წყლის ჭავლის საშუალებით მათი შეჩერება და შემდგომ დაპატიმრება მოახერხა.

არაერთი შემთხვევა დაფიქსირდა, როდესაც პოლიციელები დაიჭრნენ ფეხში მომიტინგეთა ნასროლი ისრებისა და საწვავის ე.წ „ბომბების“ გამოყენებით.

მასობრივი ანტისახელისუფლებო პროტესტი ჰონგ-კონგში ივნისში დაიწყო. მიტინგები ჩინეთში ექსტრადირების შესახებ კანონპროექტს მოჰყვა, რომლის თანახმად დაკავებულს განაჩენს ჩინეთის სასამართლო გამოუტანდა.

მთავრობამ საკანონმდებლო ცვლილებაზე უარი განაცხადა, თუმცა დემონსტრაციები და პოლიციასთან შეტაკებები არ ცხრება. აქციის მონაწილეები დემოკრატიული რეფორმების გატარებას და ჰონგ-კონგის ლიდერის, კერი ლამის მიერ თანამდებობის დატოვებას ითხოვენ.