ეს განცხადება ბაშარ ალ ასადმა ლიბანურ ტელეკომპანია „ალ მაიატისთვის“ მიცემულ ინტერვიუში გააკეთა.

ბაშარ ასადმა ეჭვი გამოთქვა, რომ სამშვიდობო კონფერენციაში მონაწილე მხარეები ნამდვილად იქნებიან სირიელი ხალხის წარმომადგენლები. მისი თქმით, კონფერენციაზე მიწვეული პირები, უცხოურ ძალებს უფრო წარმოადგენენ ვიდრე სირიელ ხალხს.

„ვინ არიან ჟენევის კონფერენციის მონაწილე მხარეები, რა ურთიერთობები აკავშირებთ მათ სირიელ ხალხთან, ეს ის ძალებია, რომლებიც სირიელი ხალხის ნებას გამოხატავენ? ამ კონფერენციის ჩატარება ძალიან ბევრ კითხვას აჩენს და ასევე ბევრი კითხვა პასუხგაუცემელი რჩება. პასუხგაუცემელია ეს კითხვა, თუ რას ემსახურება ამ კონფერენციის სტრუქტურა“, - განაცხადა ასადმა.

შეგახსენებთ, რომ ჟენევის კონფერენციის ჩატარების ინიციატივა რუსეთის ფედერაციასა და ამერიკის შეერთებულ შტატებს ეკუთვნის. დასავლეთი და არაბული ქვეყნები იმედოვნებენ, რომ აღნიშნული მოლაპარაკებებით სირიაში ხელისუფლების ჩანაცვლება მოხდება. თუმცა, როგორც ასადმა ინტერვიუში განაცხადა, მან შესაძლოა 2014 წლის საპრეზიდენტო არჩევნებში მონაწილეობა მიიღოს.