თურქეთის პრეზიდენტი დონალდ ტრამპს თეთრ სახლში ეწვია. აშშ-ს პრეზიდენტის განცხადებით, იგი ერდოღანის დიდი გულშემატკივარია და მიუხედავად იმისა, რომ ჩრდილოეთ სირიაში ცეცხლის შეწყვეტის საკითხი რთულად მიიწევს წინ, მაინც შეინიშნება პროგრესი ძალადობის შემცირების მხრივ. ინფორმაციას CBSNEWS-ი ავრცელებს.

„ჩვენ დიდი ხანია ვმეგობრობთ, თითქმის პირველივე დღიდან. ჩვენ გვესმის ჩვენი ქვეყნების და ვიცით, საიდან მოვედით".

„მე მინდა მადლობა გადავუხადო პრეზიდენტს იმ საქმისთვის, რაც მათ გასწიეს. ეს პროცესები-დავები საზღვრებთან დაკავშირებით რეგიონის სახელმწიფოებს შორის ათასობით წელია მიმდინარეობს. ჩვენ კი 7000 მილით ვართ აღნიშნული რეგიონიდან მოშორებულნი“ ,- განაცხადა ტრამპმა.

თეთრ სახლში პრეზიდენტებს შორის ძირითად საუბრის თემას წარმოადგენდა სირიის საკითხი, სავაჭრო ურთიერთობები და სამხედრო სფეროში თანამშრომლობის კომპონენტები. ჟურნალისტებმა დონალდ ტრამპს დაუსვეს შეკითხვა შესაძლებელია თუ არა თურქეთმა S-400-ის ანტისაჰაერო სისტემები გამოიყენოს თავისი საჰაერო სივრცის უსაფრთხოებისთვის და პარალელურად დარჩეს F-35-ის პროგრამაში, რომლიდანაც იგი გააძევეს იმის გამო, რომ რუსული სისტემა ნატოს ერთიან ანტისარაკეტო ფარში ვერ იქნებოდა თავსებადი.

რეპორტიორის შეკითხვას ზემოხსენებულ საკითხთან მიმართებით პრეზიდენტმა უპასუხა, რომ ისინი განიხილავენ დეტალებს ერდოღანთან ერთად.