"ის უგონოდ იყო" - რატომ მოუხსნა მოსამართლემ ხუთ მამაკაცს 14 წლის გოგონას გაუპატიურების ბრალდება

მსოფლიო - 17:18, 09 Nov, 2019

12515

ბარსელონაში, მოსამართლემ 5 მამაკაცი, რომლებსაც 14 წლის გოგონას გაუპატიურება ედებოდა ბრალად, უდანაშაულოდ ცნო.

თავისი გადაწყვეტილება მოსამართლემ იმით ახსნა, რომ გოგონა უგონოდ იყო და სექსუალური ძალადობის დროს მოძალადეებს იგი არც უცემიათ და არც დაუშინებიათ, ხოლო ესპანეთში მოქმედი კანონის თანახმად, გაუპატიურებად ითვლება აქტი, როდესაც დამტკიცდება, რომ მსხვერპლზე ფიზიკური ძალადობა ან დაშინება განხორციელდა.

"მსხვერპლი ვერ აცნობიერებდა რა ხდებოდა და შესაბამისად, მას არ შეეძლო დათანხმებოდა ან წინააღმდეგობა გაეწია ბრალდებულებს სექსუალური ურთიერთობების დამყარების დროს. შესაბამისად მათ შესძლეს აქტის განხორციელება ძალადობის ან დაშინების გარეშე," - ნათქვამია სასამართლოს გადაწყვეტილებაში.

მოსამართლემ მამაკაცებს 10-12 წლით პატიმრობა მიუსაჯა, არასრულწლოვნის მიმართ სექსუალური შეურაცხყოფის მუხლით, როდესაც გაუპატიურების ფაქტის დამტკიცების შემთხვევაში, მათ 15-დან 20 წლამდე პატიმრობა ემუქრებოდათ.

საქმე ეხება 2016 წელს მომხდარ ფაქტს, როდესაც ერთერთ წვეულებაზე, ძლიერი ალკოჰოლური და ნარკოტიკული თრობის ქვეშ მყოფ 14 წლის გოგონასთან 5 მამაკაცმა რიგრიგობით დაამყარა სექსუალური კავშირი. გოგონა აცხადებს, რომ მომხდარი თითქმის არ ახსოვს.

მოსამართლის ამ გადაწყვეტილებამ მასობრივი საპროტესტო აქციები გამოიწვია. აქციის მონაწილეები აცხადებენ, რომ ესპანეთის კანონმდებლობაში უზუსტობაა და ქალები ძალადობისაგან სათანადოდ არ არიან დაცულნი. ისინი ითხოვენ, რომ გაუპატიურებად ჩაითვალოს მებისმიერი სექსუალური აქტი, რომელიც ორმხრივი თანხმობის გარეშე შედგა, როგორც ეს 31 ევროპული ქვეყნის კანონმდებლობაშია.