ხმაურიანი ფილმის "და ჩვენ ვიცეკვეთ"-ს პრემიერამდე საათები რჩება - კინოჩვენება რადიკალი ჯგუფების მწვავე პროტესტის ფონზე გაიმართება

საზოგადოება - 09:54, 08 Nov, 2019

2135

დღეს, ქართულ-შვედური ფილმის "და ჩვენ ვიცეკვეთ" ჩვენება თბილისისა და ბათუმის კინოთეარებში ერთდროულად გაიმართება. ფილმის პრემიერა რადიკალური და ჰომოფობიური ჯგუფების პროტესტის ფონზე გაიმართება.

ლევან ვასაძე და "ქართული მარში" პრემიერის ჩაშლითა და კინოთეატრების პიკეტირებით იმუქრებიან.

ბიზნესმენი ლევან ვასაძე აცხადებს, რომ ფილმის „და ჩვენ ვიცეკვეთ“ ჩვენება ქართველმა ერმა არ უნდა დაუშვას.

„არ უნდა დავუშვათ ამ ფილმის ჩვენება არცერთ კინოთეატრში ამ სამი დღის განმავლობაში ზუსტად ისე, როგორც გასულ წელს ე.წ პრაიდი აღვკვეთეთ. ყველას, ვინც შეურაცხყოფილნი ხართ იმით, რაც გასულ კვირას აკადრეს ჩვენს პატრიარქს, მოგიწოდებთ, შემოგვიერთდეთ. ეს ერთი და იგივე პროცესია ჩვენი ქვეყნისა და ეკლესის ნგრევის.

პარასკევს, 8 ნოემბერს, 16:00 საათზე ვერის ბაღში დავდგეთ ერთად ეკლესიისა და ქვეყნის სადარჯოზე. ჩვენ შევალთ კინოთეატრებში და არ მივცემთ მათ ამ სეანსების ჩატარების უფლებას. ჩვენ გავწევთ პოლიციის კორდონებს და მაინც შევალთ კინოთეატრებში. მოვუწოდებთ ჩვენს საამაყო პოლიციელებს, არ წავიდნენ ერის ტრადიციის წინააღმდეგ“, - განაცხადა ლევან ვასაძემ.

გურამ ფალავანდიშვილი კი აცხადებს, რომ დღეს, 8 ნოემბერს ყველა იმ კინოთეატრთან იქნებიან მობილიზებულები, სადაც ფილმის „და ჩვენ ვიცეკვეთ“ პრემიერა გაიმართება.

ფილმთან დაკავშირებით საპატრიარქოს ცალსახა დამოკიდებულება აქვს - ეკლესიისთვის კატეგორიულად შეურიგებელია "სოდომური ურთიერთობების" პოპულარიზაცია, თუმცა საპატრიარქო ასევე ხაზგასმით აღნიშნავს, რომ ემიჯნებიან ძალადობრივ ქმედებებს.

განსაკუთრებული მობილიზებაა შინაგან საქმეთა სამინისტროშიც. უწყება აცხადებს, რომ სამართალდამცავები საზოგადოებრივ წესრიგს დაიცხავენ.

უწყებაში ამბობენ, რომ ფილმის ჩვენებასთან დაკავშირებით ერთ-ერთი ამოცანაა ადამიანის უფლებებისა და თავისუფლებების დაცვა, განურჩევლად ადამიანის სქესის, რელიგიური კუთვნილების, სექსუალური ორიენტაციის, გენდერული იდენტობის, პოლიტიკური შეხედულებისა და სხვა ნიშნისა. გომელაურის უწყებაში ამბობენ იმასაც, რომ ფილმის ჩვენებისას შსს უზრუნველყოფს როგორც საზოგადოებრივი უსაფრთხოებისა და მართლწესრიგის დაცვას, ასევე თითოეული ადამიანის გამოხატვის თავისუფლებას, რომელიც არ სცდება კანონით დასაშვებ ფარგლებს.

შვედეთის სახელით, ოსკარზე წარდგენილ ფილმზე - "და ჩვენ ვიცეკვეთ", დასასწრები თბილისის კინო-თეატრების, სამდღიან სეანსებზე დასასწრები, ყველა ბილეთი სრულად გაყიდულია.