აშშ-ს წარმომადგენელთა პალატამ მხარი დაუჭირა თურქების მიერ სომეხი ხალხის გენოციდის აღიარებას, რომელიც 1915 წელს მოხდა. დემოკრატების საპრეზიდენტო კანდიდატმა, ჯო ბაიდენმა განაცხადა, რომ აღნიშნული ქმედებით პატივს მიაგებენ გარდაცვლილთა სულებს. ამის შესახებ წერს BBC-ი

მომხდარ მოვლენას გამოეხმაურა თურქეთის საგარეო საქმეთა სამინისტრო და განაცხადა,რომ აღნიშნული გადაწყვეტილება მიღებულია თურქეთის მიერ სირიაში სამხედრო ოპერაციის საპასუხოდ.

წარმომადგენელთა პალატამ ასევე ხმა მისცა სანქციების დაწესებას თურქეთზე, რომელიც დონალდ ტრამპმა უნდა განიხილოს და მიიღოს საბოლოო გადაწყვეტილება.

1915 წელს სომეხი ხალხის მასობრივი მკვლელობის გენოციდად აღიარებას, 405-მა კანონმდებელმა მისცა ხმა, ხოლო 11-მა კი საწინააღმდეგო პოზიცია დააფიქსირა.

წარმომადგენელთა პალატის სპიკერმა, ნენსი პელოსიმაც მხარი დაუჭირა მიღებულ გადაწყვეტილებას და მე-20 საუკუნის პირველ ნახევარში მომხდარ ფაქტს სასტიკი დანაშაული უწოდა.

პალატის დაზვერვის კომიტეტის თავმჯდომარემ, ადამ შიფმა განაცხადა: „ წარმომადგენელთა პალატამ უკვე ხმა მისცა სომეხი ხალხის გენოციდის აღიარებას, რის მისაღწევადაც მე 19 წელი ვიბრძოდი. ამ ფაქტს ათიათასობით სომეხი ამერიკელი ადამიანი ათწლეულობით ელოდა. ჩვენ არ ვიქნებით აღიარებასთან მიმართებით თავშეკავებულნი. არ გავჩუმდებით და არასოდეს დავივიწყებთ“

თურქმა მაღალჩინოსნებმა ამერიკელთა გადაწყვეტილება სასტიკად დაგმეს - „ ისინი, ვისმა პროექტებმაც კრახი განიცადეს, დრომოჭმულ რეზოლუციებს მიმართავენ. ის ჯგუფები, რომლებიც ფიქრობენ, რომ ჩვენზე ამ გზით იძიებენ შურს, ძალზე ცდებიან. ეს სამარცხვინო გადაწყვეტილება ჩვენი ხალხისა და მთავრობის მიერ ძალადაკარგული და ანულირებულია“ ,- განაცხადა მევლუტ ჩავასოღლუმ.

1915-1916 წლებში ოსმალმა თურქებმა მასობრივად განდევნეს ანატოლიაში მცხოვრები სომეხი მოსახლეობა სირიის უდაბნოებისკენ და სხვა მიმართულებებით. ამ პროცესის მილიონზე მეტი ადამიანი იქნა მოკლული თურქი სამხედროების მხრიდან - გარდაცვლილთა რაოდენობა 1.5 მილიონს აღწევს.

თურქეთის მთავრობა აღიარებს, რომ დანაშაულებერივი ქმედებები მართლად ხდებოდა, თუმცა უარყოფენ იმ მოვლენას, რომ ქრისტიანი სომეხი მოსახლეობის მიმართ განხორციელდა მრავალჯერადი დევნისა და განადგურების ფაქტები.

სომეხი მოსახლეობის გენოციდის დღედ მიჩნეულია 1915 წლის 24 აპრილი, როცა ახალგაზრდა თურქმა მმართველებმა, რომელთა შორის მთავარ როლს ასრულებდნენ თალაათ-ფაშა, ენვერ-ფაშა და ჯემალ-ფაშა, ბრძანეს შეეკრიბათ მთელი სომხური ინტელიგენცია სტამბოლში და გადაესახლებინათ- უმრავლესობა იმავე დღეს დახოცეს.

1915 წლის 24 აპრილს დაიწყო კონსტანტინეპოლში სომეხი ინტელექტუალური, რელიგიური, ეკონომიური და პოლიტიკური ელიტის მასობრივი დაკავება (დაჭერა), რამაც გამოიწვია სომხური კულტურის მნიშვნელოვან შემოქმედთა მთელი პლეადის მთლიანი განადგურება. დაკავებულთა სიაში მოხვდნენ სხვადასხვა პოლიტიკური ხედვისა და პროფესიის ხალხი: მწერლები, მსახიობები, მომღერლები, მასწავლებლები, ექიმები, იურისტები, ჟურნალისტები, ბიზნესმენები, პოლიციელები და რელიგიური ლიდერები; ერთადერთი ფაქტორი, რომლითაც ისინი ერთმანეთთან იყვნენ დაკავშირებულნი იყო — ეროვნება და საზოგადოებრივი მდგომარეობა. გამოჩენილი სომეხი მოღვაწეების დაკავება გრძელდებოდა პატარა შესვენებებით მაისის ბოლომდე, ამასთან ერთად დაკავებულებს არავითარ ბრალდებას არ უყენებდნენ.

სომხური მოსახლეობის განადგურება გრძელდებოდა 1918 წლის სექტემბრამდე. ბოლო სამი წლის განმავლობაში დაიღუპა 1,5 მილიონზე მეტი სომეხი. დანარჩენი ნაწილი გაიქცა ან გადაასახლეს მესოპოტამიაში, ლიბანში და სირიაში უდაბნოს გავლით, სადაც ბევრი მათგანი შიმშილითა და ავადმყოფობით დაიღუპა. ერთ მილიონზე მეტი ლტოლვილი სომეხი გაიფანტა მთელ მსოფლიოში.