"გადაშენების პირას მყოფთა აჯანყება" - ეკოპროტესტებს ევროპაში დაკავებები მოჰყვა (ვიდეო)

მსოფლიო - 14:53, 13 Oct, 2019

928

"გადაშენების პირას მყოფთა აჯანყება" - ამ ლოზუნგით იმართება ევროპის თითქმის ყველა დიდ ქალაქში ეკოლოგიის დამცველთა აქციები, რომელიც მათ მიერ გამოცხადებული სამოქალაქო დაუმორჩილებლობის კვირეულის ფარგლებში მიმდინარეობს.

ბრიუსელში ეკოლოგებს აქციის გამართვა მეფის სასახლესთან 24 საათის განმავლობაში სურდათ, რისი უფლებაც მათ პოლიციამ არ მისცა და რამდენიმე მათგანი დაკავა კიდევაც. მომიტინგეები ითხოვდნენ, რომ მეფეს საგანგებო ეკოლოგიური მდგომარეობა გამოეცხადებინა 2025 წლამდე.

აქცია გაიმართა საფრანგეთის პარლამენტის შენობასთანაც, რომლის მონაწილეებმა მიმდებარე ქუჩებისა და ხიდის გადაკეტვა მოახერხეს. "ჩვენ ამას თქვენი შვილებისთვის ვაკეთებთ" - სკანდირებდნენ აქვიის მონაწილეები.

ლონდონში დემონსტრამტებმა თეატრალიზებული ფლეშ მობი გამართეს და ქალაქის ქუჩებში ჩონჩხები და კუბოები ჩაატარეს.

ქუჩები გადაიკეტა პრაღაშიც, სადაც ეროვნულ მუზეუმთან 30-მდე აქტივისტი გზის სავალ ნაწილზე დაწვა.

ევროპის ყველა ქალაქში მომიტინგეები ითხოვდნენ, რომ რაც შეიძლება მალე ქვეყნების ხელისუფლებამ სათბური აირის გამონაბოლქვი მინიმუმამდე უნდა დაიყვანოს.