ერაყში ნიღბიანი შეიარაღებული მამაკაცები თავს დაესხნენ ადგილობრივ და საერთაშორისო ტელევიზიების ოფისებს- დარბეული და გაძარცვულია შენობები. თავდასხმის შედეგად აგრეთვე სცემეს მომუშავე პერსონალიც,- ინფორმაციას ტვიტერის ოფიციალურ გვერდებზე დარბეული ტელევიზიების ადმინისტრაცია ავრცელებს.

როგორც აცხადებენ, შეიარაღებულებმა დაარბიეს ისეთი ტელევიზიები, როგორებიცაა : Dijla, NRT, Arabiya Hadath, Fallouja, Alghad Alaraby, Al-Sharqiya და Sky News Arabia. შეტევა ორგანიზებულად განხორციელდა ზემოაღნიშნულ ტელევიზიებზე - ნიღბიანმა მოროდიორებმა გაანადგურეს აგრეთვე ქურთულ, იორდანულ და ერაყულ ტელევიზიებში არსებული სტუდიები და ფოტო-ვიდეო აპარატურა.

ამ დრომდე თავდამსხმელთა იდენტიფიცირება არ მომხდარა. მასმედიაზე სინქრონული შეტევა განხორციელდა პროტესტის მეხუთე დღეს, რომელმაც სისხლიანი ფორმები მიიღო და მიმდინარეობს მწვავე შეტაკებები მომიტინგეებსა და პოლიციელებს შორის. ერაყში ანტი-სახელისუფლებო გამოსვლები წინა კვირას დაიწყო, რისი მიზეზიც მთავრობის კორუფციული საქმიანობა და უმუშევრობის მაღალი დონე იყო.

სროლების შედეგად დაღუპულია 100-მდე ადამიანი და 3000-მდე დაიჭრა,რაც 2017 წელს ისლამური სახელმწიფოს განადგურების შემდეგ ერაყში ყველაზე მასშტაბური და სისხლისმღვრელი არეულობაა.