უკრაინაში სპეცოპერაციისას მოკლული შოთა ჭიჭიაშვილი საქართველოში ჩამოასვენეს

საზოგადოება - 20:41, 05 Oct, 2019

1850

უკრაინაში სპეცოპერაციისას მოკლული შოთა ჭიჭიაშვილის ცხედარი საქართველოში ჩამოასვენეს, რომელსაც თბილისის საერთაშორისო აეროპორტში ოჯახის წევრები დახვდნენ.

საქართველოს ნომერ პირველ ტერორისტად წოდებული შოთა ჭიჭიაშვილი 2 ოქტომბერს მოკლეს.

სპეცოპერაციის შემდეგ, უკრაინელმა სამართალდამცავებმა ჭიჭიაშვილის ლიკვიდირების კადრები გაავრცელეს.

ჭიჭიაშვილი 2013 წელს ამნისტიის საფუძველზე პატიმრობიდან გაათავისუფლეს.

მანამდე შოთა ჭიჭიაშვილი მოსკოვში 2003 წლის 24 ივნისს დააკავეს. რუსეთის ხელისუფლებას მან პოლიტიკური თავშესაფარი სთხოვა. თუმცა, რუსეთის პრეზიდენტმა მისი თხოვნა არ დააკმაყოფილა.

2004 წლის 21 იანვარს, მისი საქართველოში ექსტრადირება განხორციელდა.

ჭიჭიაშვილს შეიარაღებულ ბანდიტურ დაჯგუფებებში მონაწილეობისათვის ქართველი სამართალდამცავები 1997 წლიდან ეძებდნენ. 2000 წლიდან იგი უკვე ინტერპოლის წითელი ცირკულარით იძებნებოდა. მას ადამიანების გატაცებებსა და მკვლელობებში ედებოდა ბრალი.

გამოძიების მტკიცებით, სწორედ მისი ორგანიზებულია ისეთი ცნობილი და გახმაურებული საქმეები, როგორიცაა: ბრიტანელი ბანკირის პიტერ შოუს, ესპანელი ბიზნესმენების, წითელი ჯვრის საერთაშორისო კომიტეტის წევრებისა და პარლამენტარ პეტრე ცისკარიშვილის გატაცება და პანკისის ხეობაში დატყვევება, ასევე გივი თარგამაძის აფეთქება.