CNN-ის ინფორმაციით, ჰონგ-კონგში შეტაკება მოხდა პოლიციასა და მომიტინგეებს შორის, რა დროსაც სამართალდამცველებმა ცრემლსადენი გაზი, რეზინის ტყვიები და წყლის ჭავლი გამოიყენეს აქციის დასაშლელად.

დემონსტრანტებმა გზები გადაკეტეს- სახელდახელოდ დამზადებული ნაგვის ურნებისგან აღმართეს ბარიკადები მოძრაობის შესაფერხებლად, რომლის შემდეგაც პოლიციას დაუშინეს ქვები და მოლოტოვის კოქტეილები, საპასუხოდ კი სამართალდამცველები იძულებულნი გახდნენ, გამოეყენებინათ ცრემლსადენი გაზი და რეზინის ტყვიები. შეტაკებების შედეგად დაზიანებულია სახელმწიფო უწყებათა შენობების გარე ფასადი და ჩამსხვრეულია მინები. პარალიზებულია აგრეთვე მეტროს მუშაობა ქალაქის ცენტრში.

მიმდებარე ტერიტორიაზე გაიმართა აგრეთვე კონტრაქცია ჩინეთის მხარდამჭერთა მიერ, რომელშიც მონაწილეობდა 200 ადამიანი.

ჰონგ-კონგის მცხოვრებლები უკვე ზედიზედ რამდენიმე თვის განმავლობაში იკრიბებიან მასობრივ თავყრილობებზე ჩინეთის ცენტრალური ხელისუფლების პოლიტიკის წინააღმდეგ, ცალკეულ შემთხვევაში მათი რაოდენობა მილიონსაც აღწევს. ხშირად აქციები მთავრდება პოლიციასთან შეტაკებით, აეროპორტისა და სამთავრობო შენობების ბლოკირებით.