უკრაინის ყოფილმა გენერალურმა პროკურორმა, იური ლუცენკომ უარყო ამერიკის პრეზიდენტის ბრალდება იმასთან დაკავშირებით, რომ ჯო ბაიდენის შვილმა, ჰანთერ ბაიდენმა დაარღვია უკრაინის კანონმდებლობა მისი მუშაობის პერიოდში.

,, ბატონ ბაიდენს არ დაურღვევია უკრაინული კანონმდებლობა მისი მუშაობის პერიოდში’’,- განაცხადა ლუცენკომ WASHINGTON POST-ისთვის მიცემულ ინტერვიუში.

დონალდ ტრამპისა და მისი ადვოკატის, რუდის გიულენის განცხადებით მათ ჰქონდათ გარკვეული მტკიცებულებები, რომლითაც დასტურდებოდა, რომ ამერიკის ვიცე-პრეზიდენტის, ჯო ბაიდენის თანამდებობაზე ყოფნის პერიოდში ამერიკული მხარე მოითხოვდა უკრაინისგან გენერალური პროკურორის გადაყენებას, რომელიც იძიებდა ვიცე-პრეზიდენტის შვილის კორუფციულ დარღვევებს უკრაინაში მოღვაწეობის განმავლობაში.

როგორც ცნობილია, ჰანთერ ბაიდენი 2014-იდან 2019 წლამდე იყო გაზის კერძო კომპანია, ბურისმას დირექტორთა საბჭოს წევრი.

ამერიკული მედიის თანახმად, 25 ივლისს ტრამპსა და ზელენსკის შორის გამართული კომუნიკაციის დროს, ამერიკის პრეზიდენტმა სცადა, დაერწმუნებინა უკრაინელი კოლეგა , ჰანთერ ბაიდენის წინააღმდეგ დაეწყო გამოძიება, რათა ამით მოეხდინა გარკვეული ზეწოლა დემოკრატთა პოტენციურ საპრეზიდენტო კანდიდატზე, ჯო ბაიდენზე.