ნელი თევდორაშვილს, რომელსაც აგვისტოში შვილი გარდაეცვალა და ორ მცირეწლოვან შვილიშვილს მარტო, უკიდურეს გაჭირვებაში ზრდის, სოციალური დახმარება მოუხსნეს, - ამის შესახებ "პრესა.ჯი" იტყობინება.

გამოცემის ინფორმაციით, სოციალური დახმარების შეჩერების მიზეზი ის გახდა, რომ თევდორაშვილს წლების წინ აშენებულ სახლში ხის იატაკი აღმოუჩინეს.

"პრესა.ჯი" წერს, რომ ჯანდაცვის ახალი მინისტრის განკარგულებით, 100 000-ზე მეტ მოქალაქეს სოციალური დახმარება შეუწყვიტეს, ეს კი იმისთვის კეთდება, რომ ქვეყანაში სიღარიბის შემცირების ყალბი სურათი დაიხატოს. გამოცემა სხვა მოქალაქეებსაც ასახელებს, ვისაც სოციალური დახმარება მოუხსნეს:

"ერთერთი, ვისაც სოციალური დახმარება მოუხსნეს, მანანა კაპანაძეა საჩხერიდან. ის რამდენიმე დღის წინ ჯანდაცვისა და სოციალური დაცვის სამინისტროში მივიდა, განცხადება დაწერა, თუმცა, როგორც ამბობს, არავინ ყურადღება არ მიაქცია.

ქალაქ რუსთავში, ე.წ. შემოწმების შედეგად 300-მდე ოჯახი დარჩა სოციალური დახმარების გარეშე...

სოციალური მომსახურების სააგენტოს ვებ-გვერდზე გამოქვეყნებული გრაფიკული მონაცემების მიხედვით, 2012 წლის შემდეგ სოციალური დახმარების მქონეთა რაოდენობა თითქმის ყოველწლიურად მცირდება", - წერს გამოცემა.