მოსკოვის გარეუბან ბირიულევოში მომხდარ მკვლელობაში ეჭვმიტანილმა, გუშინ მოსკოვში დაკავებულმა აზერბაიჯანის მოქალაქემ ორჰან ზეინალოვმა აღიარა, რომ 25 წლის იგორ შერბაკოვი მოკლა.

ამის შესახებ რუსული მედია წერს და ამატებს, რომ ზეინალოვმა, რომელმაც დაკავებისას პოლიციას წინააღმდეგობა გაუწია, მკვლელობა მოგვიანებით, პოლიციელთან პირად საუბარში აღიარა.

ზეინალოვი მოსკოვთან ახლოს, კოლომნის პარკში აიყვანეს, სადაც ის იმალებოდა და ნაცნობებისგან დახმარებას ელოდებოდა. ის მოსკოვში ვერტმფრენით გადაიყვანეს და ამჟამად წინასწარი პატიმრობის იზოლატორში იმყოფება. 

მანამდე პოლიციამ მილიონი რუბლის პრემია დააწესა იმ პირისთვის, ვინც სამართალდამცველებს ნებისმიერ ინფორმაციას მიაწვდიდა ზეინალოვის ადგილსამყოფელის შესახებ. 

ვინაიდან მსგავსი პრემიების გაცემის საკითხი, ინფორმაციის გამცემის ანონიმურობის მიზნით, ყველა ქვეყანაში გასაიდუმლოებულია, უცნობია, რუსმა სამაღთალდამცველებმა ზეინალოვს თავად მიაგნეს, თუ მიღებული ოპერატიული შეტყობინების შედეგად.

შეგახსენებთ, რომ იგორ შერბაკოვი ბირიულევოში 10 ოქტომბერს, მეგობარი გოგოს თვალწინ, დანის რამდენჯერმე ჩარტყმით მოკლეს, რასაც მოსახლეობის მღელვარება და ე.წ. „კავკასიური აღნაგობის მოქალაქეების“ მიმართ აგრესიის გამოვლენა მოჰყვა, რაც არეულობით, სამართალდამცველებთან შეტაკებითა და ათეულობით ადამიანის დაკავებით დასრულდა.